Genesesi
17 Abulamu paŵakwete yaka 99, Yehofa ŵawonechele kwa jwalakwe ni kumsalila kuti, “Une ndili Mlungu jwamachiligosope, mjendeje mwakuŵajilwa pameso pangu soni mkakola chakulemwa chilichose. 2 Chinjitenda chilanga pasikati pa une ni mmwejo mwamti chinjimtendekasya kola yisukulu yejinji mnope.”
3 Pelepo Abulamu ŵatindiŵele mpaka ngope jakwe pasi soni Mlungu ŵapitilisye kuŵechetana najo kuti, 4 “Une ndesile chilanga ni mmwejo soni kuti mmwejo chimchiŵa mtati jwa ŵandu ŵa mitundu jejinji. 5 Mmwejo ngamŵasoni Abulamu,* nambo chimŵe Abulahamu* ligongo chinjimtendekasya kuŵa mtati jwa ŵandu ŵa mitundu jejinji. 6 Chinjimtendekasya kuti mkole ŵanache ŵajinji soni mwa mmwejo muchityochela mitundu ja ŵandu nambosoni mamwenye.
7 “Chinjitenda yanasasile mu chilanga cha pasikati pa une ni mmwejo, soni kwa ŵanache* ŵenu ŵakwika panyuma penu mpaka ku mibado* jawo josope. Chelechi chichiŵa chilanga changamala, kulosya kuti une chinjiŵa Mlungu jwenu soni jwa ŵanache* ŵenu wosope ŵakwika panyuma penu. 8 Une chinjimpa mmwejo pampepe ni ŵanache* ŵenu wosope chilambo chosope cha Kanani chamkutama mpela mlendochi. Chilambo chelechi chichiŵa chawo mpaka kalakala, soni une chinjiŵa Mlungu jwawo.”
9 Mlungu ŵapitilisye kuŵecheta ni Abulahamu kuti, “Nambo mmwejo mkusosekwa kusunga chilanga changu pampepe ni ŵanache ŵenu wosope ŵakwika panyuma penu mpaka kumibado jawo josope. 10 Sambano achi ni chilanga changutenda ni jemanja. Mkusosekwa kukuya chilanga chelechi pampepe ni ŵanache ŵenu. Chilanga chakwe chili chakuti, “Jwamlume jwalijose pasikati penu akusosekwa awumbaleje. 11 Mkusosekwa kuti mwumbaleje kuti chiŵe chimanyisyo cha chilanga chindesile pasikati pa jemanja ni une. 12 Mu mibado jenu josope, mwanache jwamlume julijose jwakwanisye masiku 8 akusosekwa kuwumbala, soni jwamlume julijose jwakupagwa m’nyumba jenu atamose jwele nganaŵa mwanache jwenu kapena jwele mwatesile kumsuma ni mbiya kutyochela kwa mlendo akusosekwa kuwumbala. 13 Jwamlume julijose jwakupagwa m’nyumba jenu soni jwamlume julijose jumwamsumile ni mbiya syenu, akusosekwa kuwumbala. Chilanga changu changutenda ni jemanja pa chilu chenu chichiŵa chilanga champaka kalakala. 14 Naga jwamlume julijose jwangawumbala ngakuwumbala, akusosekwa kumwulaga kuti akasimanikwasoni pasikati pa ŵandu ŵakwe, ligongo akasile chilanga changu.”
15 Kaneko Mlungu ŵamsalile Abulahamu kuti, “Pakwamba ya ŵamkwenu Salai,* mkasimwakolangasoni kuti Salai pakuŵa sambano lina lyawo chiliŵe Sala.* 16 Une chinjimpa upile Sala soni chinjimpa mmwejo mwanache jwamlume kupitila mwa jwalakwe. Chinjimpa upile Salajo, mwamti mwa jwalakwe muchityochela mitundu jejinji ja ŵandu soni mamwenye.” 17 Pelepo Abulahamu jwatindiŵele mpaka ngope jakwe pasi ni kutanda kuseka soni kuŵecheta mumtima mwakwe kuti, “Ana yisyene mundu jwa yaka 100 mpaka akole mwanache, soni Sala jwamkongwe jwakuti akwete yaka 90 mpaka aŵeleche mwanache?”
18 Myoyo Abulahamu ŵamŵendile Mlungu jwakuwona kuti, “Chonde ampe upile Isimayeli.” 19 Pelepo Mlungu ŵaŵechete kuti, “Ŵamkwenu Sala chachimŵelechela mmwejo mwanache jwamlume soni chimumpe lina lyakuti Isaki.* Chinjitenda chilanga ni jwalakwe. Chilanga chelechi chichiŵa champaka kalakala chele chichakwayasoni ŵanache* ŵakwe ŵakwika panyuma pa jwalakwe. 20 Nambo pakwamba ya Isimayeli mbikene kuŵenda kwenu. Une chinjimpa upile jwalakwe soni chinjimtendekasya kuti akole ŵanache, mwamti chachiŵa ŵajinji mnope. Mwa jwalakwe muchityochela achimlongola 12 soni chinjimtendekasya jwalakwe kuti aŵe mtundu wekulungwa. 21 Nambope chinjitamilikasya chilanga changu ni Isaki jwele Sala chachimŵelechela mmwejo pandaŵi mpela jinojino chaka chamalaŵi.”
22 Mlungu paŵamasile kuŵechetana ni Abulahamu, ŵatyosile. 23 Kaneko Abulahamu ŵamjigele Isimayeli mwanache jwakwe pampepe ni achalume wosope ŵakupagwa m’nyumba jakwe ni jwalijose juŵamsumile ni mbiya nambosoni jwamlume jwalijose jwa m’nyumba ja Abulahamu. Jwalakwe ŵawumbesye jemanjajo pa lisiku lilyolyo mwakamulana ni yaŵamsalile Mlungu. 24 Abulahamu ŵaliji ali akwete yaka 99 pandaŵi jiŵawumbalaga. 25 Nombenajo Isimayeli mwanache jwa Abulahamu ŵaliji ali akwete yaka 13 pandaŵi jiŵawumbalaga. 26 Palisiku lyelelyo Abulahamu ŵawumbele pampepe ni mwanache jwakwe Isimayeli. 27 Achalume wosope ŵa m’nyumba jakwe ni jwalijose jwakupagwila m’nyumba jakwe soni jwalijose juŵamsumile ni mbiya kutyochela kwa mlendo, wosopewo ŵawumbele pampepe ni jwalakwe.