LIJIGANYO 9
Ana Mpaka Tukosecele Catuli Misongano ja Mpingo Mwakuŵajilwa?
Cambodia
Ukraine
Naga akulijiganya Baibulo ni jwa Mboni sya Yehofa, mwangakayicila akusalingaga kulola cile mkanipaŵe ngani jilijose jacakalijiganye. Kutenda yakulandana ni yeleyi kuli kwakusosekwa mnope mkanajawule kukusongana ni mpingo. Pakusaŵa yakuyicisya yambone mnope naga atamilikasisye ndaŵi jakuŵajilwa jakutendela yeleyi.
Amanyilile ndaŵi, soni malo gakulijiganya. Ana ndaŵi japi jampaka aŵice nganisyo syawo syosope pakulijiganya? Ana kuli kundaŵindaŵipe, mkanatande masengo, kapena cilo ŵanace ali apite kukugona? Atamose kuti ngaŵa mkulijiganya kwandaŵi jelewu, aganicisye ndaŵi jacamalile pakulijiganyako, soni alolecesye kuti pangali cakwasokonesya. Atame pamalo gakutulala, soni atyosye yakusokonesya yiliyose mwakusimisya wailesi, TV, soni foni jam’miyala. Kupopela mkanatande lijiganyo kucakamucisya kumasya yakudandawulisya yasimene nayo palisikulyo kuti aŵice nganisyo syawo syosope pa Maloŵe ga Mlungu.—Afilipi 4:6, 7.
Aŵiceje yimanyisyo munganijo, soni akosecele kuti akajanje. Atande kosecela mwakulola ngani josopejo mwakata. Aganicisye ya mtwe wa nganijo kapena caputala, alole kukamulana kwa mitwe jamwanamwana ni mtwe wekulungwa, alole yiwilili, soni alole mawusyo gakumbesi gagakusagombelecesya songa syekulungwakulungwa. Kaneko aŵalanje ndime jilijose, soni apate kwanga kwa ciwusyo cakwe cacilembile. Awugule ni kuŵalanga malemba ganganalemba maloŵe gakwe, soni aganicisye kakamulane kakwe ni nganijo. (Masengo 17:11) Naga apatile kwanga kwa ciwusyo, alembe msele kapena aŵice cimanyilo pamaloŵe gakusosekwa mnope mu ndimejo kuti cakamucisye kumbucila kwanga kwakwe. Kaneko pali pamisongano, komboleka kwimika mkono naga akusaka ni kwanga mwakata mwangaŵalanga maloŵe ga mundimejo.
Naga akukosecela ngani syakulekanganalekangana sya pamsongano mlungu uliwose, cacijonjecesya lunda lwawo “mwakusunjila cipanje” ca kumanyilila Baibulo.—Matayo 13:51, 52.
Ana yindu yapi yampaka atendeje pakukosecela misongano ja mpingo?
Ana mpaka akosecele jika catuli kuti akajanje pamisongano ja mpingo?