Twakamucisyeje Ŵandu Ŵangakombola Kuŵalanga

1. Ana kwiganya ŵandu ŵangakombola kuŵalanga kuli kwakusawusya catuli?

¹ Ŵandu ŵangakombola kuŵalanga mpaka akole lung’wanu ni yindu yausimu, nambo ndaŵi sine akusatenda sooni kulijiganya Baibulo. Kwa ŵandu ŵeleŵa ngayikusaŵa cenene kwagaŵila buku ja Baibulo Limaphunzitsa Chiyani kundanda kwene. Ana mpaka twakamucisye catuli ŵandu ŵeleŵa? Twawusisye ŵakulalicila ŵakutyocela yilambo yakupunda 20 kuti asale yakusatendaga pakamucisya ŵandu ŵangakombola kuŵalanga. Yine mwa yindu yaŵasasile ni yayili pasipa.

2. Ana tumabuku twapi twatuli twakamucisya mnope kwa ŵandu ŵangamanyilila kuŵalanga?

² Naga jwakulijiganya akumanyilila kuŵalanga panandipe kapena ngakumanyilila kwene, yikusaŵa cenene kutanda ni kabuku kakuti, Apikanileje Mlungu kapena kakuti, Apikanileje Mlungu Kuti Atame ni Umi Wangamala. Mpayiniya jwine ku United States akusatanda kuŵecetana ni mundu mwakumpa tumabuku tosopetu ni kumsalila kuti asagule kakusaka. Abale ŵa ku Ofesi ja nyambi ku Kenya ŵasasile kuti tumabukutu tuli twakamucisya mnope m’cilambo cawo ligongo ŵandu ŵajinji ku Africa akusalijiganya yindu mwakwamba kupikanila ngani m’malo mwakutagulilana nawo pakamulicisya masengo yiwusyo. Kwa ŵandu ŵakupakombola kuŵalanga yikusaŵa yangasawusya kutagulilana nawo pakamulicisya masengo yiwusyo, nambo litala lyeleli ngalikusaŵa lyambone kwa ŵandu ŵangamanyilila kuŵalanga. Nambo naga jwakulijiganyajo akusakombola kuŵalanga panandi, ŵakulalicila ŵajinji akusanonyela kutanda ni tumabuku twakuti Ngani Syambone Kutyocela kwa Mlungu! kapena Mlungu Komboleka Kuŵa Mjawo! mwinesoni Buku Jangu ja Ngani sya M’Baibulo.

3. Ana yindu yapi yayili yakusosekwa kumanyilila patukwiganya ŵandu ŵangakombola kuŵalanga?

³ Ŵayamicileje: Ŵandu ŵangakombola kuŵalanga mpaka atendeje sooni, soni ŵajinji mpaka aliwoneje kuŵa ŵangasosekwa. Kuti twajiganye usyesyene, candanda tukusosekwa kwakamucisya jemanjaji kuliwona kuŵa ŵakusosekwa. Ŵajinji mwa ŵandu ŵangamanyilila kuŵalanga akusaŵaga ŵalunda, soni akusaŵa ŵakusacilila kulijiganya. M’yoyo tukusasosekwa kwacimbicisya, soni kwakamucisya mwakutulala mtima. (1 Pet. 3:15) Pakutanda kuyiwona yakulijiganyayo kuŵa yakusosekwa mnope, soni kuti yili yakamucisya cacijendelecela kulijiganya, soni cacijawula pasogolo mwausimu. M’yoyo tukusasosekwa kwayamicila mwakuwona mtima.

4. Ana mpaka twalimbikasye catuli ŵakupakombola kuŵalanga panandi kuti akoseceleje lijiganyo?

⁴ Atamose kuti mundujo ngakumanyilila cenene kuŵalanga, amlimbikasyeje kosecelela kabuku kakwe. Ŵakulalicila ŵane ku South Africa akusiŵasalila ŵakulijiganya ŵawo kuti ŵaŵendeje ŵacibale ŵawo ŵakusaŵalanga cenene kuti ŵakamucisye kosecela. Jwakulalicila jwine ku Britain pakusaka kwakamucisya ŵakulijiganya ŵakwe kosecela akusiŵapa buku jakwe pandaŵi jakwajiganya kuti alole mwayikusaŵela yangasawusya kupata kwanga naga mundu akosecele mwakata misele. M’bale jwine ku India akusiŵalimbikasya ŵakulijiganya ŵakwe kuti akoseceleje mwakulola yiwulili yayili m’lijiganyo lyakuyicisya ni kuyiganicisyaga m’kanipaŵe.

5. Ana mpaka tulosye catuli kuti tuli ŵakuusimana mtima patukwiganya ŵandu ŵangakombola kuŵalanga?

⁵ Aŵeje Ŵakuusimana Mtima: Yangali kandu ni buku jakukamulicisya masengo, nambo akusosekwa aloleje yiwundo yekulungwakulungwape, soni ŵakamucisyeje ŵakulijiganyawo kuyipikanicisya. Pakutanda kwiganya ŵandu ŵangakombola cenene kuŵalanga ŵajiganyeje kwa kandaŵi kamnono, mwine kwa maminisi 10 kapena 15. Akasajiganya yindu yejinji ndaŵi jimo. Kuli cenene kwamba kwajiganya ndime syamnonope. Awusimaneje mtima mundujo pakuŵalanga panandipanandi. Cacikusya lunda lwakwe lwakuŵalanga pakutanda kumanyilila yejinji ya Yehofa. M’yoyo, kuti ŵakulijiganyawo ammanyilile cenene Yehofa, akusosekwa kwaŵilanjila ku misongano ja mpingo.

6. Ana mpaka twakamucisye catuli ŵandu kumanyilila kuŵalanga?

⁶ Pacacimanyilila kuŵalanga, ŵakulijiganyawo cacijawula pasogolo mwausimu mwacitemacitema. (Sal. 1:1-3) Ŵakulalicila ŵane akusiŵakamucisya ŵakulijiganya Baibulo ŵawo kuŵalanga mwakamulicisya masengo kabuku kakuti Alipelece pa Kuŵalanga ni Kulemba kumbesi kwa lijiganyo lyawo lya Baibulo. Naga jwakulijiganya Baibulojo akutanda kuliwona kuti ngakukombola, amlimbikasyeje mwakumlosya yindu yakukombola kutenda apanopano kulekangana ni kala. Amsalile kuti Yehofa cajendelecele kumkamucisya, soni amlimbikasye kupopela kwa jwalakwe. (Miy. 16:3; 1 Yoh. 5:14, 15) Ŵakulalicila ŵane ku Britain akusiŵasalila ŵakulijiganya kuti atamilikasyeje yindu yakusosekwa kuyikwanilisya candanda, mwine kutanda kaje kwinjisya pamtima alifabeti kaneko kulijiganya kupata malemba m’Baibulo mwawo ni kugaŵalangaga, soni pambesi pakwe kutanda kuŵalanga mabuku gangasawusya kuŵalanga. Kwiganya mundu kuŵalanga kukusasakasoni kumkamucisya mundujo kuti anonyeleje yakulijiganyayo m’malo mwakwamba kumjiganya basi.

7. Ligongo cici ngatukusosekwa kuŵambala kwajiganya usyesyene ŵandu ŵangakombola kuŵalanga?

⁷ Yehova ngakusiŵawona ŵandu ŵangamanyilila kuŵalanga mpela kuti ali ŵangasosekwa. (Yobu 34:19) Yakusawungunya Yehofa mwa mundu yili mtima wakwe. (1 Mbiri 28:9) M’yoyo, akalepelaga kwajiganya ŵandu usyesyene ligongo lyakuti ali ŵangamanyilila kuŵalanga. Tukwete yida yambone mnope yejinji yakwajiganyila ŵandu ŵeleŵa. Panyuma pakwe cacikomboleka kwajiganya mbali sine sya usyesyene pakamulicisya masengo buku ja Baibulo Limaphunzitsa Chiyani.