Kongolela Katende Ketu ka Undumetume—Twakamucisyeje Ŵakulijiganya Baibulo Kosecela

Ligongo Cici Kuli Kwakusosekwa: Ŵakulijiganya Baibulo kuti akule mwausimu, akusasosekwa kuti alisyeje nganisyo syawo soni mitima jawo ni yijiganyo yandanda ya m’Maloŵe ga Mlungu. (Ahe. 5:12–6:1) Kulijiganya kukusasosekwa mtawu. Kukusapwatikapo kuŵa jwakupakombola kulekanganya yindu yawuyimanyi yasambano soni yakalakala ni kulola mwampaka wuyikamulicisye masengo. (Miy. 2:1-6) Naga jwakulijiganya Baibulo jwetu tumjiganyisye kuwungunya yindu pajika mpaka yimkamucisye kuti ajanjeje yiwusyo ya m’Baibulo pakamulicisya masengo mabuku getu. Naga akulimbicila kutenda yosope yakomboleka kuti ayikamulicisyeje masengo yakulijiganyayo yicimkosecelesya kuti caŵe jwakulimba pacacisimana ni yakulingwa.—Luk. 6:47, 48

Mwampaka Tutendele:

Agombelecesye kusosekwa kwakuŵenda cikamucisyo kwa Yehofa kupitila mwipopelo mkanatande kulijiganya ndaŵi syosope.—Yoh. 14:26; 1 Akoli. 2:10.
Kutandila kundanda kwene, amlimbikasyeje jwakulijiganya Baibulo kuti akosoceleje mkanipaŵe. Amlosyeje buku jawo, soni amjiganyeje mwampaka atendele pakata misela songa syakusosekwa mnope.
Amlimbikasyeje kuti ajanjeje yiwusyo pakamulicisya masengo maloŵe gakwe. Aŵambaleje kutendesya lijiganyolyo m’litala lyakuti jwakulijiganya nawo Baibulojo akagambaga kuŵalanga pakwanga yiwusyo kutyocela m’buku.
Amlimbikasyeje jwakulijiganya Baibulo kuti aŵalanjeje Maloŵe ga Mlungu lisiku lililyose. Naga akwete upile wakwinjila pa Intaneti amlosye ndandanda jakuŵalanjila Baibulo ja pa jw.org/ny, jajikukusalosya litala lyambone lyakutendela yeleyi. Kuti mundu asyoŵelele kuŵalanga Baibulo lisiku lililyose, akusasosekwa kuti alipeleceje mnope yele pambesi pakwe yikusaŵa ni yakuyicisya yambone.—Sal. 1:2, 3.
Amlosye jwakulijiganya Baibulo mwampaka apatileje kwangwa kwa yiwusyo ya m’Baibulo pakamulicisya masengo Buku la Mboni za Yehova Lofufuzira Nkhani kapena Kukambitsirana za m’Malemba. Amkamucisye kumanyilila tumaloŵe twakata twakusala mabuku gatukusakamulicisyaga masengo pamisongano ja mpingo.

Alinje Kutenda Yakuyicisyayi Mwesi Awuno:

Pamalisisye mtwe wamwana kapena wekulungwa, am’wusye jwakulijiganya Baibulo kuti asale mwakata yalijiganyisye pa ka mtweko kapena pa mtwe wosopewo. Naga nganakola lijiganyo lya Baibulo, alijiganye kuŵeceta mwakata ndime jine jakwe jalijiganyisye m’Baibulo kapena mu Sanja ja Mlonda kuti alole naga ajipikanicisye cenene.