Ayisalayeli akasimene ni yakusawusya chiŵandika myesi mcheche pa ulendo wawo wakutyoka ku Babulo kwawula ku Isalayeli. Nambo Yehofa jwasalile kuti chatyosye chindu chilichose chachikalepelekasisye kuwujila ku Isalayeli. Kwa Ayuda ŵakulupichika, kuwujila ku Isalayeli chaliji chindu chakusosekwa mnope kupunda yakusawusya yakasimene nayo pa ulendowo. Chindu chakusosekwa mnope chaliji upile wakuja kutandilasoni kumtumichila Yehofa. Nambope kwaliji kwangali malo gakumtindiŵalila Yehofa. Kwaliji kwangalisoni malo gakupelechela mbopesi mwakamulana ni Chilamusi cha Mose soni kwaliji kwangali ŵakutaga mbopesi ŵakakamulaga masengoga. Konjechesya pelepa, ku Babulo kwapalisoni ŵandu ŵajinji ŵaŵalambilaga milungu jaunami kulekangana ni ŵandu ŵaŵamtumichilaga Mlungu jwakuwona. Myoyo Ayuda ŵakulupichika masausande gejinji ŵaliji ŵakusachilila kuwujila kumangwawo ni chakulinga chakuti akatandilesoni kulambila kweswela. w23.05 14-15 ¶3-4

Tukusosekwa chikamuchisyo cha msimu weswela wa Mlungu kuti tukombole kutenda yindu “mpela ŵanache ŵa lilanguka.” Yili myoyo, ligongo yili yakusawusya kuti tukole ndamo syambone m’chilambo chakusakalachi. (1 Ates. 4:​3-5, 7, 8) Msimu weswela ni wampaka utukamuchisye kuti tukajigalila kaganisye ka chilambo chakusakalachi, yayikupwatikapo lunda lwa ŵandu ŵa ku chilambo soni yitendo yakutindana ni yakusasaka Mlungu. Nambosoni msimu weswela ni wampaka utukamuchisye “kutenda yiliyose yambone.” (Aef. 5:9) Mpaka tukole msimu weswelawu naga tukumŵenda Yehofa mwipopelo. Yesu jwasasile kuti Yehofa ‘chachipeleka msimu weswela kwa wosope ŵakumŵenda.’ (Luk. 11:13) Tukusapochelasoni msimu weswelawu patukumtumichila Yehofa pamisongano jetu ja Chiklistu. (Aef 5:​19, 20.) Msimu weswela ni wawukusatukamuchisya kuti tutendeje yindu yakumsangalasya Mlungu. w24.03 23-24 ¶13-15

Ana wawojo akusosekwa kuti aŵe ŵakuwusimana mtima mnope? Naga yili myoyo, amŵendeje Yehofa kuti ŵakamuchisyeje kuŵa jwakuwusimana mtima ndaŵi syosope. Kuwusimana mtima jili ndamo jawukusatukamuchisya msimu weswela kuti tukole. (Agal. 5:​22, 23) Tukusosekwa kumŵenda Yehofa kuti atupe msimu wakwe weswela wampaka wutukamuchisye kola ndamoji. Patusimene ni ndamo jampaka jisokonasye kuwusimana mtima kwetu ‘tupitilisye kuŵenda’ msimu weswela kuti utukamuchisye kukola ndamoji. (Luk. 11:13) Mpaka tumŵendesoni Yehofa kuti atukamuchisyeje kuti tuyiwoneje yindu mpela mwakusayiwonela jwalakwejo. Kaneko panyuma pakupopela tukusosekwa kutenda yampaka tukombole kuti lisiku lililyose tulosyeje kuwusimana mtima. Myoyo, patukumŵenda Yehofa kuti atukamuchisye kuŵa ŵakusimana mtima kwineku tuli mkulingalinga kukola ndamoji yichiŵa yangasawusya kuti ndamoji jitamilichiche m’mitima mwetu ni kuŵa mbali ja umi wetu. Yikusatukamuchisyasoni kuti tuganichisyeje yisyasyo ya m’Baibulo. Baibulo jikwete yisyasyo ya ŵandu ŵajinji ŵaŵaliji ŵakuwusimana mtima. Mpaka tulijiganye yampaka tutende kuti tuŵe ŵandu ŵakuwusimana mtima patukuganichisya ngani sya ŵanduŵa. w23.08 22 ¶10-11