“Dab Mu Tulufrad!”
“FAAN RA yib reb ara l’agruw e Pi Mich Rok Jehovah ko tabinaw rom, dabmu tulufrow!” Be weliy e simbung u morngaagen ban’en ni buch u Treviso, nu lel’uch u Italy, ya ke chugur ni nge mul reb e million e lire (aram salpiy ni kab boor ko $600, U.S.) u pa’ reb e tasiyobay ni bochan e ke tuluf l’agruw e Pi Mich Rok Jehovah ni kar bow nga tabinaw rok.
Ke weliy e simbung ni ke yog e gali Mich nem ngak fare pumoon e pi thin ni baaray: “Daba’ e rran nib fel’ ni fan ngom. Gamow e Pi Mich Rok Jehovah ma bay ban’en ni baga’ fan ngom ni nggu piew ngom.” Chi ngiyal’ nem, me ning fare moon nde gol e mab, me ere de yog rok e gali mich nem ni ngar weliyew e thin rorow.
Faan ni mang e motoyil fare moon ngorow, ma ra nang ni ke yib e gali Mich nem ko tabinaw rok ni fan ni ngar sulwegew e wallet rok, ya kar piriegew u daken e benchi u reb e park. Dariy ban’en nrayog ni nge rin’ e gali Mich nem ere kar fekew e wallet ni bay boor e salpiy riy nga tafen e polis ni bin th’abi chugur ngorow. Fa bin migid e rran me sulweg e polis e wallet ngak fa en ni fen.
Ke yog e simbung ni Il Gazzettino ni “faanra gathi fagali Mich ni kan tulufrow e kar piriegew e re wallet nem ni bay boor e salpiy riy ma baga’ . . . nra fek e girdi’ e salpiy. Machane gathi aram rogon e Pi Mich Rok Jehovah ya thingar ra pired ni yad ba yul’yul’.”
Mang e be k’aring e Pi Mich Rok Jehovah ni ngar pired ni yad ba “yul’yul’”? Ireram ban’en ni bpuluw ko machib ni tay Jesus Kristus, ni ba t’uf Got rorad ma ba t’uf yugu boch e girdi’ rorad. (Matthew 22:37-39) Aram fan ni ma yan e Pi Mich Rok Jehovah u mit e tabinaw iyan ni fan ni ngar wereged fare thin nib fel’ u morngaagen fa “bin nib biech e fayleng” ni i micheg Jehovah Got. Re athap ney e kab baga’fan ko yugu boch e chugum!—2 Peter 3:13