“Gad Taab Tabinaw”
UGUBIN yang u fayleng ko ngiyal’ ney ma ba laniyan’ e girdi’ riy ni fan ko teliw rorad nge raen dowrad. Magawon u thilin reb e ganong nge reb e ke k’aring ni ngan thang e fan ko girdi’ nge ngan gafgownag e girdi’ nib elmirin nge yugu boch e kireb. Bay e report ko Amnesty International, ni be yog ni kan th’ab e motochiyel ko mat’awun e girdi’ ma aram ke n’igin ni boor ko 23 milyon e girdi’ ni thingara milgad u tabinaw rorad ko duw ni 1994.
U Rwanda ma kan li’ 500,000 e girdi’ kar m’ad ma boor ko 2,000,000 e girdi’ ni kar milgad nga bayang u tomren ni ke sum fare cham u thilin yu Tutsi nge yu Hutu. Be yog e shimbung ni Belgian ni Le Soir ni “Kan gafgownag e Pi Mich Rok Jehovah nib elmirin ya kar siyeged ni ngar feked talin e cham.” Pi Mich Rok Jehovah e der ma un ko cham. Machane kan li’ bokum miriay iyad ko re cham nem. Re n’ey e ma yibnag ngan’dad e thin ni yog Jesus ngak pi gachalpen ni gaar: “Gathi ki gimed e girdi’ nu fayleng, ereray fan ni ke fanenikaymed e girdi’ nu fayleng.”—John 15:19.
Reb e tabinaw ni yad e Pi Mich ni—Eugène Ntabana, nge an leengin, nge l’agruw e bitir ni fakrow—e ur pared u lan e mach u Kigali. Ma nap’an ni ra weliy Eugène ngak e piin buguli yoror rorad morngaagen e par u mathilin e magawon ko pi nam ma ke taarebnag ko fare floras ni bougainvillea, ni aram ba floras ni ma gararaw nga lang ma ba adag e yafang nib gowel.—Matthew 22:21.
Ma weliy Eugène ni gaar, “U roy u Kigali ma boor mit raen e floras ko bougainvillea ni bay e rorow nge pink, nge ku wechwech. Machane yad gubin ma taab tabinaw fa taab mit. Ku aram rogon e girdi’. Yugu aram rogon nib thilthil e nam rodad fa raen dowdad fa ganong rodad, machane gad gubin taab tabinaw ni aram e tabinaw ko girdi’.”
Bay e kireban’ riy ya yugu aram rogon ni ur pared u mathilin e magawon ma ur mon’eged e gapas machane yib ba ulung i girdi’ kar li’ed e tabinaw ku Ntabana kar m’ad. Machane kar pared nib yul’yul’ ku Got. Ere rayog ni nge mich u wan’dad ni ra lebuguy Jehovah Got e n’en ni ke micheg ni fan ko girdi’ ni aram rogon, ma ra fasegrad ko yam’ u lan e fayleng ni dariy be’ riy nib laniyan’. (Acts 24:15) Ma aram ma chon Ntabana nge yugu boch e girdi’ e ra pirieg e “par u fithik’ e gapas ni yad ba falfalan’.”—Psalm 37:11.