Mini’ ni Yad Ra Mang e Pi Tamachib?

NAP’AN nni fl’eg e muulung ko World Council of Churches 40 e duw kafaram, kan nog ngak e girdi’ ni ngar “pasiggad ko machib” mar filed rogon ngak fare ran’ i saf rorad ni nga “ranod ngar machibgad.” Lal e duw u tomur riy, me yoloy John A. O’Brien, ni ir reb e tayugang ko Katolik, ni ba t’uf ni ngan gay e tin biech i gachalpen ni “nga darod ngorad” ma gathi ke mus ni “gad ra par u but’ u lan e naun rorad.” Ma nap’an e January 1994, yog Pope John Paul II ni ngiyal’ nem e “gathi ba ngiyal’ ni ngan tamra ko Gospel, machane aram bangiyal’ ni ngan machibnag u daken e chigiy ko naun.”

Ba gagiyel ni pi pong ney ko piin ni tamachab e ke taw ko girdi’ ndar ted telrad ngay. Ke weliy e simbung nu Australia ni Illawarra Mercury fithingan ni gaar: “Dabun e pi Katolic nu Yim’uch u Australia ni ngar folwokgad rok e Pi Mich Rok Jehovah ngar wereged e michan’ rorad.” Ke yog reb e pumoon ni ngam mang reb e tamachib e ke mus ni aram e “lem ko Katolic.” Me gaar reb e pumoon: “Ffel’ ni nge mon’og e Galesiya, machane gathi u mit e tabinaw iyan. Sana kab fel’ ni ngan fl’eg e skul ara ngan pi’ e babyor u post ngak e girdi’.” Mus ko reb e ga’ ko reb e cathedral e de nang rogon ni nge weliy e thin ni yog e papa. Ye gaar: “Gamad ra pi’ e athamgil nga laniyan’ e girdi’ ni ngar folgad ko pi thin ko Gospel. Machane machib u mit e tabinaw iyan e de puluw.” Re headline ney ni immoy ko reb e simbung e ba tamilang: “Dabi fol e pi Katolik ko pong ni ke pi’ e Papa ni ngar machibgad.”

Yugu demtrug ni dabi machib Kristendom u mit e tabinaw iyan, ke pag lal i million e Pi Mich Rok Jehovah ni yad be fol rok Jesus’ ni nga ‘ranod ngak girdien e pi nam u gubin yang ngar pingeged yad ngar manged pi gachalpen.’(Matthew 28:19, 20; mu taarebnag ko Acts 5:42.) Yad be maruweliy e machib u mit e tabinaw iyan u 230 e nam. Fare thin ni yad be wereg e bpuluw, ya be tamilangnag e pi n’en ni ke micheg e Bible nra yib i m’ug nga m’on. Mang ndab mu non ngorad ko yay ni migid ni yad ra yib nga tabinaw rom?