Angin ni Ma Yib ko Gum’ercha’ey nib Mocha’

MANANG e pi togta ko science nra kireb fithik’ e dowef ni faan ra par be’ nib damumuw u gubin ngiyal’. Ke pag raay e duw kafram ni gaar The Journal of the American Medical Association (JAMA): “Faanra yim’ be’ ko ngiyal’ ni kari damumuw, ma yima yog ni ke war gum’ercha’en nde yog ni ngki maruwel ko ngiyal’ ni ke damumuw. Buchuw e girdi’ nib mich u wan’rad ni ma yim’ e girdi’ ni bochan ni ke par nib damumuw nib n’uw nap’an ma ar fan ni ke war gum’ercha’en.”

Der gin e piin ni ma fil e Thin Rok Got ngay. Ya gonap’an 2,900 e duw u m’on ni ke yog e JAMA ni bay e riya’ riy ni ngan par ni yiba damumuw ere tay Got e thin nga laniyan’ Solomon ni Pilung ni nge yoloy e re thin ney: “Gum’ercha’ey nib mocha’ e aram gelngin e n’en nib fos.” (Proverbs 14:30) Kab puluw e pi thin nem ko ngiyal’ ney.

Faan gad ra par ni gad ba mocha’ u gubin ngiyal’, ma ra ayuwegdad ngad siyeged e m’ar ni ma sum ni bochan ni be tomalnag ban’en lanin’dad ni bod e high blood pressure, alngeng, nge matungufan. Maku, gathi ke mus nra yib angin u fithik’ dowdad machane ku ra ayuweg nge fel’ thildad yugu boch e girdi’ ni faanra gad ra athamgil ni dabda “damumuwgad, ma dabi yib e puwan’” ngodad. (Psalm 37:8) Kakrom, ma baadag e girdi’ ni ngar bad ra guyed Jesus ya ba sumunguy ma i lemnag salperad. (Mark 6:31-34) Ku rayog ni ngad pied e athamgil nga laniyan’ yugu boch e girdi’ nfaanra ngad pired nib mocha’ gum’ercha’dad.​—Matthew 11:28-30.