Urngin e Babyor e Aram e Tamilang ni Yib Rok Got?

GELNGIN GOT, ni i thagthagnag e Thin nib Thothup, e ku i thagthagnag e pi babyor ni ma lemnag boch e girdi’ ni aram e pi babyor nib thothup? (2 Timothy 3:16) Kan fith e re deer ney u reb e babyor ko Jesuit nu Italy ni (La Civiltà Cattolica), ni kan ngongliy “u tan pa’ e [Vatican] Secretariat ko State” me ere kan lemnag ni baga’ fan e re babyor ney ko Katolic.

Yog fare babyor ko Jesuit ni gaar: “I wereg Got wom’engin fare Thin u daken e Kan ni Thothup, ni mus ko pi babyor nib thothup ko pi nam ni gathi yad piyu Israel nge pi babyor nde m’ag ko yalen e Kristiano.” Ma lemnag piyu Jesuit ni pi babyor nib “thothup,” ni bod e babyor ni kan nog e Zoroastrian Avesta ngay ara fa Aningeg e Babyor Rok Confucius, e “Kan ni Thothup e ke suruy” ni ngan yoloy, me ere, aram e pi babyor ni bay e ‘tamilang ni yib rok Got riy.’”

Machane, reb e thin ni be tamilangnag ban’en e be gaar: “Gathi gubin e pi babyor nib thothup nem e aram e thin rok Got,” me weliy ni piin ni kar yoloyed e pi babyor nem e kan “suruy lanin’rad ko machib ko yugu boch e teliw nge lem ko girdi’ ko ngiyal’ ney.” Marco Politi, ni ir e tayoloy thin ko fare simbung nu Italy ni kan nog e La Repubblica ngay e ma tamilangnag e pi n’en ni ma buch ko Vatican me weliy ni re machib ney e “be pithig rogon nrayog ni nge pethuy e Galesiya ko Katolic ko pi teliw ni immoy kakrom,” ma rayog ni nge sul u rogon ni nge muulung e pi yurba’ e teliw u taabang ni fan ko meybil ni bod ni kan fl’eg u Assisi ko duw ni 1986, ni aram e muulung ni ke yarmiy John Paul II.

Jehovah e gathi ba Got nde yaram ma gathi ir ba Got ni maathukthuk laniyan’. (1 Korinth 14:33) Ere dabiyog ni nge mudugil u wan’dad ni kan ni thothup, ara gelngin Got e ra thagthagnag bang e babyor nde puluw ko Thin Rok, ni Bible. De pi’ Paul e athamgil nga lanin’uy ni nge taareb urngin “barba’ e teliw,” machane i yoloy “nri taareb e l’agan’ ni bay . . . taareb e Somol ni bay, ma go’ taareb e michan’, ma taareb e taufe.”​—Efesus 4:4, 5.

Re “taareb e l’agan’ ni bay’” ney e ba m’ag ko michan’ ngak Jesus Kristus. Be gaar e Bible: “Ke mus ni Jesus e rayog rok ni nge thapeg e girdi’ ngak Got; ya dakuriy yugu reb e ngachal nga bayang u roy u fayleng ni pi’ Got ngak e girdi’, ni ir e rayog rok ni nge thapegdad ngak Got. (Acts 4:12) Dariy yugu reb e “babyor nib thothup” ni be tamilangnag rogon nra lebguy Got fiti laniyan’ u daken Jesus Kristus. Ke mus ni ra tamilang u wan’dad rogon nra thapegdad Got ngak ni faanra mich u wan’dad ni Bible e aram e Thin Rok Got.​—John 17:3, 1 Thessalonika 2:13.