Report Ko Piin Ni Ma Wereg E Thin U Morngaagen Gil’ilungun Got

Ngan Wereg Awochngin Gil’ilungun Got u Gubin Ngiyal’

THIN ROK GOT ni fare Bible, e ma yog e sorok ko girdi’ nib madangdang. Solomon ni Pilung e ke gaar: “Mu yung e woldug ko ley ni kadbul e yal’ ma dab mu pag paam nge toffan ko balayal’; ya dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.”​—Eklesiastes 11:6, NW.

Gubin ngiyal’ ni rayog ma ma yung e Pi Mich Rok Jehovah e “awoch” mi yad wereg fare thin nib fel’ ko Gil’ilungun Got. Yad ma wereg e machib u lan boor ko 230 e binaw nge donguch, ma “urngin e rran nra ul’ulgad ngay nguur filed ngak e girdi’ ma yad be machibnag ngak e girdi’ fare thin nib fel’ ni morngaagen Jesus, ni ir fare Kristus.” (Acts 5:42) Baaray boch e experience ni be tamilangnag ni Pi Mich Rok Jehovah e dabra ‘paged pa’rad ni nge toffan’ ko maruwel ko machib.

◻ U Republic of Cape Verde, ma reb e Mich Rok Jehovah e be yan u but’ u tooben e kalbus u nap’an ni be un ko machib. Ma u lan fare courtyard ko re kalbus nem e immoy boch e girdi’ ni yad e kalbus ni kar ranod nga l’igin ba ke gek’iy. Ma kar guyed fare Mich ni be yan u but’, mar tolulgad ngak ni nge pi’ boch e magazine ngorad. Ere ke m’ag fare Mich boch e Watchtower nge Awake! nga reb e malang me yon’ nga baraba’ e yoror ko kalbus. Ma wenegan ni ke yib riy e kan tababnag 12 e Bible study. Ma dalip e pi kalbus ney e kar ognaged yad ku Got mar uned ko taufe u fithik’ e ran. Ma reb e kalbus e ke pag reb e duw ni be un ko machib nib full-time ni ir e pioneer. Ma uw rogon ni yad ma un ko machib u kalbus? Som’on ma ran yu guruynag fare kalbus ko pi territory. Ma aram min wereg e territory ko fa dalip e Pi Mich ma yad ra yan nga reb e singgil nge reb. Ma yad ma ayuweg e piin ni ba adag e machib ni bod rogon ni ma rin’ e Pi Mich Rok Jehovah u gangin e fayleng​—ya yad ma sul ngorad. Machane ban’en nib thil riy e uw urngin yay ni yima fil e Bible ngak e girdi’. Ya dabni fil e Bible ngak be’ ni ke mus taareb fa l’agruw yay u reb e wik ni taareb e awa n’umngin nap’an, ya yima fil e Bible ngak boch e kalbus u gubin e ran! Maku fa en ni ga’ ko kalbus e ke pag e Pi Mich ni ngar ted urngin e muulung u lan e re kalbus nem.

◻ Kan pi’ e pi babyor ko Watch Tower ngak reb e ppin u Portugal u tomren ni yim’ e titaw rok. Gathi ir e Pi Mich Rok Jehovah ere dabun ni nge fakay. Machane, ku dabun ni nge n’ag. Ma reb e ran ni ke yib e Mich Rok Jehovah nga tafen u nap’an ni be yan ko machib u mit e tabinaw iyan, me yog ngak u morngaagen e pi babyor nem. Ma ke fith fare Mich ko ri manang fan ko uw fene ga’ fan e pi babyor nem fa danga’. Ma ke yog fare ppin ni gaar: “Ga manang, dagu nang ko uw fene ga’ fan e pi babyor nem, me ere ra diin mu gu nang?” Ma ke fel’ u wan’ e re ppin nem ni ngar filew e Bible u taabang, ma aram i chaariy e pi babyor nem ko titaw rok. Ma chiney ke mang reb e Mich Rok Jehovah ma ke un ko taufe. Maku fak ni ppin nge reb e fager ko re tabinaw nem e yow be fil’ e Bible. Ke yan i aw ni rib baga’ fan e pi babyor nem ni kan pi’ ngak!