Ba Magal ni nra Pow’iy e Kanawo’ ko Yafas Rom

“RI gu manang, O Jehovah, ni girdi’ nu fayleng e de mil fan e kanawo’ rorad ngorad. Ya dabiyog ko girdi’ ni ngar gagiyegnaged e yan rorad.” (Jeremiah 10:23, New World Translation) Pi thin ney e be dag profet Jeremiah riy ni dabiyog ko girdii ni nga ranod u kanawoen e yafas rorad ni dariy be’ ni be ayuwegrad. Uw e rayog ni ngan pirieg e ayuw riy? Facha’ ni yoloy a Psalm e fulweg ko meybil rok ngak Jehovah ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.”​—Psalm 119:105.

Piin ma fil e thin rok Got ni bay u Bible mi yad fol ko thin riy e bod be’ ni tabab ko milekag ni ri kadbul. Som’on, e dabiyog ni nge guy ban’en nib fel’ rogon ya ka bay e lumor. Machane nap’an ni ra tabab ni nge yib e yal’ nga lang ma ra fel’ buch uw rogon e sap rok. Tomur riy ma ra mat e yal’ ma kari fel’ rogon ni nge guy gubin ban’en. Rayog ni nge guy gubin banen ni rib fel’ rogon. Re fanathin ney e be puguran ngodad fare thin u Bible ko Proverb ni gaar: “Kanawoen e piin mat’aw e bod ba magal nib ga’ raen ma be achichig raen iyan nge mada’ ko ngiyal ni kari rran.”​—Proverbs 4:18, NW.

Ma uw rogon e piin ni kar siyeged e ayuw rok Got? Be yog e Bible ni gaar: “Kanawoen e piin kireb e bod e lumor; ma yad be dol’ ni bochan ni dar nanged fan.” (Proverbs 4:19, NW) Arrogon, piin nib kireb e bod be’ ni be dol’ u fithik’ e lumor. Mus ni ke m’ug ni ke yib angin ngorad buch uw machane dabi par nib n’uw nap’an, “ya dariy e gonop, ara llowan’, ara fonow ni yib rok Jehovah.”​—Proverbs 21:30 (NW).

Ere, ngan fol ko fonow ni bay ko thin rok Got u Bible. Faan ga ra rin’ ni aram rogon ma ram pirieg nib riyul’ fare thin u Proverbs 3:5, 6 (NW) ni gaar: “Mu pagan’um ngak Jehovah u polo’ i lanin’um, ma ri dab mu tor ko tin ni ga be finey ni ga manang. Nguum lemnag Jehovah u fithik’ urngin banen’ ni ga be rin’, me dag ngom e bin mat’aw e kanawo’.”