Ngan Gel ko pi n’en nib Mo’maw u lan “fare Binaw ni Yigi ma Buch Ban’en ndan Lemnag” — LIBRARY U ONLINE ni fan ko Wulyang ko Damit

Report Ko Piin Ni Ma Wereg E Thin U Morngaagen Gil’ilungun Got

Ngan Gel ko pi n’en nib Mo’maw u lan “fare Binaw ni Yigi ma Buch Ban’en ndan Lemnag”

FITH apostal Paul ngak e pi Kristiano u nap’an e bin som’on e chibog u Korinth ni gaar: “Ma faanra dabi thoy e en ni ma thoy e yabul nrogon ni nge thoy, me mini’ e ra fal’eg rogon ni fan ko mahl? Ra aram rogon ma ra diin me nang be’ fan e n’en ni ga be weliy nthin ndawor ni rung’ag ma da nnang fan?”—1 Korinth 14:8, 9.

U Papua New Guinea, ni yima yog fare Binaw ni Yigi ma Buch Ban’en ndan Lemnag ngay, ma boor ban’en ni ma pi’ e magawon ko Pi Mich Rok Jehovah ni ke mo’maw ni ngan wereg fare tamilang nu Bible. Ya ke pag 700 mit e thin ko re binaw nem ma boor e yalen rorad nib thil thil. Maku boor e burey, ma buch uw e kanawo’ nib fel’, ma be yoor iyan e bugel. Ma gathi ke mus e pi n’en nib mo’maw e bay riy, ya bay e togopuluw ko boch e teliw nge boch e tayugang ko skul.

Machane, be wereg e Pi Mich Rok Jehovah fare thin nib fel’ ni bod e en ni ma thoy e yabul nrogon ni bochan ni yad be fol babyor ko tirok Got ban’en ma be yoor iyan e babyor ko thin rorad ni be tamilangnag e thin ko Bible. Ma boor yay ma ke yib angin e machib ni yad ma tay ya arrogon ni be dag e re report ney ni baaray:

• Tabolngin e ngiyal’ ni kan sul nga skul, ma ba adag reb e sensey ni nge nang ko mang fan ni der un e bitir ko Pi Mich Rok Jehovah ko siro’ ko flak ara tang ko am. Ke fith e re n’ey ku Maiola ni 13 e duw rok ma ir e Mich ni ke un ko taufe. Ke pi’ Maiola e fulweg nib tamilang ni bay ko Bible. Ke fel’ u wan’ fare sensey ya bay ko Bible. Ma kan weliy e re n’em ngak urngin e sensey ko re skul nem.

Munmun, ma kan nog ko pi student ni ngar yoloyed e essay me turguy Maiola ni nge weliy u morngaagen e Trinitas. Babyor ni ke fl’eg e bin th’abi fel’ ko re class nem, ma ke fith e sensey rok ko uw e ke pirieg e pi thin nem riy. Ke dag ngak fare babyor ni Rayog ni Ngam Par ni Gab Fas u Paradis u Fayleng ko thin ni Meriken. Ma aram me dag fare sensey e re ke babyor nem ngak urngin e bitir, ma boor iyad e ba adag ni nge yog ba ken ngorad. Bin migid e rran me wereg Maiola 14 e babyor nge 7 e magazine ngak e bitir ni yad ma skul, ma ke tabab dalip e Bible study. Be nameg Maiola ni nge un ko pioneer nib full-time.

• Bay buch uw e Pi Mich Rok Jehovah u lan reb e binaw u dap’ e l’ay u Port Moresby ma ba gel e togopuluw ni kan tay ngorad ni ka nap’an e 1970 iyib ngaray. Machane, ke yib e ayuw ngorad ko gin ndar lemnaged. Fare bishof ko United Church e be’ nu Papua New Guinea ma ke un ko skul nib tolang u bang, ma reb e rran me pining e girdi’ ko galesiya rok ni ngar fithed boch e deer. Fith reb e pumoon ni gaar: “Bay l’agruw raba’ e teliw ko binaw rodad—fare United Church nge Pi Mich Rok Jehovah. Ere susun mang e nggu rin’ed ko ngiyal’ ni yib e Pi Mich rok Jehovah nga tafenmad?” Ke n’uw nap’an boch ni de non fare bishof, nge mu’ ke fulweg ni gaar: “Ga manang, da gu nang ko mang e nggog ngomed. De n’uw nap’an faram me yib l’agruw e Pi Mich nga tafenag ni yow pagal. Ur fithew reb e deer ngog, ma da gu nang e fulweg riy, me gag e ug un ko skul nib tolang. Machane kar piew e fulweg ngog ni bay ko Bible. Ere dab gog ngomed e n’en ni ngam rin’ed—Ra be’ ma ir rok. Faanra dabum ma de t’uf ni ngam motoyilgad ngorad, machane dab mu rin’ ban’en nib kireb ngorad.”

Tomur riy ma reb e piilal ni ma lekag e ulung ko Watch Tower Society e ke un ko Pi Mich ko re binaw nem me gaar: “Ke chugur ni gubin e girdi’ ko re binaw nem e ur motoyilgad ko Pi Mich u nap’an ni kar ranod ko machib. Ma boch e girdi’ e ur pininged yad nga lan e naun rorad. Chiney ma ke bod e paradis ni fan ko machib.”