Ba Mabgol nib Virgin ni Dariy e Par ko Pumoon nge Ppin Riy?
BOOR e piin ni ma art ara ma fl’eg e liyos ni sculptor e ur yaanaged Josef ni ir be’ nib pillibthir ya aram rogon nrayog ni nge puluw ko fare machib ni ke par Maria nib virgin u nap’an e mabgol rorow. Ur lemnaged ni Josef e bod e an matanag ku Maria ma gathi bod figirngin. Machane ke thiliyeg John Paul II ni ir e Papa nu Roma e re lem nem. Ya ke yog ni Josef e “gathi ir be’ nib pillibthir.” Ya “ba flont fithik’ i dow, ni aram e taw’ath ni pi’ Got ngak, ere ke n’igin ni nge yog ni ngar parew Maria ni yow mabgol machane bay e t’ufeg rorow nib virgin.”
Faanra ke m’agan’ Maria ngay ni nge par nib virgin n’umngin nap’an e yafas rok, ma mang fan ni ke micheg ni ngar mabgolgow be’? I pi’ fare papa e fulweg ni gaar: “Ya rayog ni ngan lemnag ni ngiyal’ ni kar michegew yow ngorow ma kar puruy’gow Josef nge Maria min turguy ni ra par Maria nib virgin.”
Machane gathi aram rogon ni yog e Bible. Thin ko Matthew e be yog ni “ke falnag Josef ir rok Maria nge yan i mada’ ko ngiyal’ ni gargelnag Maria fare tir riy.” (Matthew 1:25, Catholic New American Bible, italics ours.) Tomren ni kan gargelnag Jesus ma de par Josef nge Maria nib muchugbil. Re n’ey e bay e mich riy ya boch nga tomren ma be weliy u lan e Gospel ni bay pi walagen Jesus ni pumoon nge ppin.—Matthew 13:55, 56.
Ere be yog e Bible ni Maria e ba virgin u nap’an ni ke gargelnag Jesus, machane dariy e mich riy ni ke par nib virgin n’umngin nap’an e yafas rok ni yow Josef.