Ngan Chuguliy e Bitir nib Fel’ e Gafarig Rorad Ku Rayog Fa?
ROGON e par ko ngiyal’ ney e rib mo’maw, ya boor mit e girdi’ ni be par u taabang, ere dakuriy e gafarig ni taareb rogon,” arrogon ni yog Robert Glossop ni be’ ko fare Vanier Institute for the Family u Ottawa, Canada. Ma mang wenegan ni ke yib riy? Kan weliy u lan e simbung ni The Toronto Star ni gaar: “Be yoor iyan e piin fel’ yangaren nib diyen, nge piin fel’ yangaren ni yad be cham nge piin fel’ yangaren ni yad be li’ed yad ngar m’ad.”
Gathi ke mus ni North America e bay e re magawon nem riy. Bill Damon ni ir fare director ko fare Center for Human Development u Brown University u Rhode Island, U.S.A., e ke fil morngaagen e pi magawon ney u Britain nge yugu boch e nam u Europe, ngu Australia, nge Israel, nge Japan. Ke yog ni girdi’ ko galesiya nge girdien e skul, nge yugu boch e ulung e darir pow’iyed e bitir nib fel’ rogon. Ke lemnag ni rogon e yalen ko ngiyal’ ney ma “darir nanged ko mang e ba t’uf ko bitir rodad me fel’ e gafarig rorad mi yad llowan’.” Ke weliy u morngaagen e girdi’ ni be fil rogon ni ngan chuguliy e bitir ni yad ma yog ni “faanra ngan gechignag e bitir ma ra kirebnag laniyan’ nge dowef rorad,” miki yog Damon ni re n’ey e “aram rogon ni ngan chuguliy e bitir mi yad gelan’ mab balyang.”
Mang e ba t’uf ko piin fel’ yangaren ko ngiyal’ ney? Ba t’uf rorad ni ngan fonownagrad u fithik’ e t’ufeg u gubin ngiyal’ ma ngan yal’uweg laniyan’rad nge gum’ercha’rad. Ma ra reb e bitir ma ba thil rogon ni ngan llowan’nag nib puluw. Rayog ni ngan llowan’nag e bitir ni ngan non ngak nge nang fan ban’en nfaanra ran’ rin’ u fithik’ e t’ufeg. Aram fan ni be yog ko Proverbs 8:33 ni ngad ted “teldad ko gechig.” Machane boch e bitir e dabiyog ni ngan “yal’uwegrad ko thin.” Ere ba t’uf ni ngan gechignagrad u rogon nib puluw ko n’en ni kar rin’ed. (Proverbs 17:10; 23:13, 14; 29:19) Be weliy e Bible e re n’ey machane gathi be yog ni ngan pi’ e gechig u fithik’ e damumuw ara ngan li’ nib elmirin’, ya rayog ni nge maadad e bitir ara bechnag dow. (Proverbs 16:32) Ba t’uf ko fare tir ni nge nang ko mang fan ni kan gechignag ma ngari nang ni fare llabthir e bay ko ba’ rok.—Mu taarebnag ko Hebrews 12:6, 11.
Fare babyor ni The Secret of Family Happiness e be tamilangnag e thin ko Bible u morngaagen e re n’em.