Kan Pining e Sorok ko Ngongol nib Fel’

FARE simbung nu Italy ni La Gazzetta del Mezzogiorno e ke weliy e thin ni be pining e magar ko Pi Mich Rok Jehovah ko fare thin ni kar fl’eged ko babyor rorad ni “Matera​—Ba Mach nib Lingagil e Pi Bokngo Riy.” Bay e re thin ney ko fare babyor ni Awake! ko July 8, 1997, ma kan fl’eg u bokum mit e thin. Yibe fl’eg e Awake! ko 81 e thin ma boor ko 19 milyon ken e re babyor nem ni yibe wereg u ga’ngin e fayleng. Ke weliy fare simbung ni fare Awake! e th’abi gel ni ke wereg e thin ni be tamilangnag e re mach nem ko girdi’.”

Re simbung nem e ke pining e magar ko Pi Mich Rok Jehovah ko reb e convention ni “Michan’ ko Thin Rok Got” ni kan tay u Matera ko duw ni 1997. Ke weliy ni ke muulung e Pi Mich ni yad “4,000 e girdi’ u taabang u lan fare tagil’ e gosgos ni XXI Settembre Stadium u ngalan’ e gawel u taraen e yal’; ma kar klinnaged e gin’em, mar acheyed boch ban’en, ma kar fl’eged boch ban’en ni ke kireb riy (ni pi kolosis) ma kar rin’ed ndariy puluwon, ma kar chuw’iyed e tin nib t’uf ko re maruwel nem.”

Ma athamgil e Pi Mich Rok Jehovah ni ngar manged e piin buguli yoror nib fel’. (Matthew 22:37-39) Ku yad ma fol ko re thin ko Bible ney ni be gaar: “Ma susun e ngar um pired u fithik’ e piin ndar nanged Got nib fel’ pangimed, . . . me chirofen ni sul Kristus riy mi yad nang nib fel’ e ngongol romed, ma aram mi yad yog e sorok ngak Got.”​—1 Peter 2:12.