“Mini’ e Ke Gargeleg e Waangchol?”

BE’ ni ir e journalist u nap’an e bin 19 e chibog e ke weliy morngaagen e waangchol ni aram ba “jewelry nran ni yib ko fayleng, me sum ko nifeng.” An Tasunmiydad e ke fith ngak Job ni gaar: “Gur ba’ e chitamangin e waangchol fa?” (Job 38:28) Aram e be pugurannag Got ngak Job ni ir tapgin e waangchol.

Rib fel’ yaan e waangchol, maku be puluwnag e Bible ko flaab, nge but’ nib yong’ol, nge woldug ni pire’, nge yafas. (Genesis 27:28; Deuteronomy 33:13, 28; Zekariah 8:12) Nap’an e ngalan’ e gawel ko yu Israel, ma fare “waangchol nu Hermon” e ke ayuweg e woldug ko binaw, me ere ke ayuweg e yafas ko girdi’. Fare burey nu Hermon e bay boor e gek’iy u daken mab tolang me ere ma aw e ayis ngay ma ka chiney e bay e garbeb ni ma yib riy me yan nga lang ma ma ngal’ ni waangchol. I weliy David ni re waangchol ney e bod rogon fene fel’ e par u taabang ko piin ni ma liyor ku Jehovah.​—Psalm 133:3.

Ma rogon ni machibnag Moses ni profet piyu Israel e pi’ e garbeb ko girdi’ ni bod e waangchol. I gaar: “Machib rog e bayi aw ni bod e n’uw, me ngal’ ni waangchol u but’ ni kadbul.” (Deuteronomy 32:2) Ngiyal’ ney ma be weliy e Pi Mich Rok Jehovah e thin nib fel’ ni ma pi’ e yafas ko girdi’ u morngaagen Gil’ilungun Got ma yad be wereg u ga’ngin e fayleng. (Matthew 24:14) Be pi’ Got e pong ko girdi’ ni be gaar: “‘Moy!’ i gur e en ni ke yib e belel ngom; ngam fek fare ran ko yafos nib tow’ath ni yira pi’ ngak e en ni ba adag ni nge yog ngak.” (Revelation 22:17) Bokum milyon e girdi’ u gubin e nam e yad be un ko re garbeb ney nib spiritual ni yib rok Got ma rayog ni nge ayuweg e yafas rodad ndariy n’umngin nap’an.