Urngin E Pi Tamachib Ko Teliw E Ke Michan’rad Ko Pi N’en Ni Yad Be Machibnad Fa?

KA FINI yim’ figirngin fare ppin. Me yog fare prist ngak ni re pumoon nem ni figirngin e gathi rib fel’ ni rayog ni nge yan nga tharmiy maku gathi rib kireb me ere dabni gechignag ko nifiy u infierno. Ere yog fare prist ni be par nib gafgow ya yibe gechignag nge yan i mada’ ko ngiyal’ ni ke bung rogon nrayog ni nge yan nga tharmiy. Ke pi’ fre ppin puluwon fare prist ni nge yibilay figirngin ni rayog ni nge chuw u purgatorio nib pay. Ma ke felan’ fare ppin ya kari mich u wan’ e re n’em ma be lemnag ni ku arrogon u wan’ fare prist.

Ga be lemnag ni ra kireban’ fare ppin ni faanra ke pirieg ni fre prist e de mich u wan’ ni yima gechignag e girdi’ u tomren ni kar m’ad fa? Boor e girdi’ ma ke wagey lanin’rad ya kar pirieged ni boor e tamachib ko teliw e de mich u wan’rad e pi n’en ni yad be machibnag morngaagen. Fare babyor ni National Catholic Reporter, e ke weliy u morngaagen “ba magawon ko pi tamachib ni kab gel ko magawon rorad ni boor i yad e be un ko ngongol ndarngal ma re magawon ney e baaray: “Boor e pi tamachib e dar mich u wan’rad ni ba’ Got ma dakura mich u wan’rad ko machib u morngaagen ni yira flaabnagey ara ngechignagey maku de mich u wan’rad e fas ko yam’ . . . me ere re lem ney ni de michan’rad ko boch ban’en e ke longobiyrad ni bod e ath.”

Maku arrogon yugu boch e teliw. Kan fith fith ko pi vicar ko fare galesiya ni Church of England ma kan pirieg ni boor i yad e “de mich u wan’rad e machib ko Kristiano ni bod e virgin birth, nge pi maangang ni ngongliy Jesus nge bin l’agruw e wub rok fare messiah,” aram e n’en ni kan weliy u lan e shimbung nu Australia ni Canberra Times.

Reb e girdi’ ni ma yoloy e thin u morngaagen e teliw ni George R. Plagenz fithingan e ke fith ku be’ ni tamachib ko uw rogon nrayog ni nge fil reb e machib ko girdi’ ni ir ma de michan’ ngay. Ma reb e tamachib e ke yog ni ke thiliyeg e tin som’on e thin ko creed ni “Ke mich u wan’ug.” Ke gaar: “Gu ma tababnag e creed ko pi thin ney ni, ‘Ke michan’rad ku Got ni Th’abi Gel . . . ’” Yog Plagenz ni aram e ngongol ni ba dake moding ma aram e “bin th’abi ga’ e sasalap u lan e re nam ney.”

Bay e kireban’ riy ya boor e girdi’ e ke chuwan’rad ko teliw ni bochan e pi tamachib ni aram rogon ni de michan’rad ko machib ni yad be tay ma dar yul’yul’gad. Machane gathi ke mus aram e n’en ni be wageynag laniyan’ e girdi’ u morngaagen e teliw ko ngiyal’ ney. Ya boor e girdi’ ni ma un ko teliw e kan fil ngorad ni Bible e Thin rok Got. Ma yad ra gin ngay ni ngan nog ngorad ni boch e machib ko galesiya e dariy ko Bible.