“Mu Fil Ngak Ba Pagal Rogon e Ngongol ni Ngi I Tay”

RA NGE yib angin e maruwel ko milay, ma dabi gaman ni ngan wereg awochngin e woldug nga but’ min sul in e pul nga tomren ko mokun woldug. Ba t’uf ni ngan maruweliy e but’ nib elmirin, min yung awochngin e woldug, min puog e ran nga daken min ayuweg e woldug ni fan ni nge ga’ iyan.

Re maruwel nem e be tamilangnag ni ba riyul’ e pi thin ko Proverbs 22:6 ni be gaar: “Mu fil ngak ba bitir rogon e ngongol ni ngi i tay, mi i par u wan’ u n’umngin nap’an e yafos rok.” Arrogon, ra nge yib angin ni nge chuguliy e gallabthir e bitir rorad ma ba t’uf ni ngar filed rogon e ngongol ni ngi i tay.

Machane boor e gallabthir ni dar folgad ko re fonow ney ya re fayleng ney e ma pag ni nge rin’ e bitir e n’en ni baadag. Nap’an ni ngar folgad ko llowan’ ko fayleng ni nge pithig e bitir e magawon rok, ma baga’ ni ma par ni goo ir nthingari ayuweg ir. Ma aram rogon nra par e bitir u pa’ e girdi’ nib kireb ma yad ra suruy laniyan’ ko ngongol nib kireb.​—Proverbs 13:20.

Kab fel’ ni nge fil e gallabthir rogon e ngongol ko Kristiano ngak e pi bitir rorad ko ngiyal’ ni kab pagal! Uw yangaren? Be yog apostal Paul, “nnap’an ni kab bitir.” Aram rogon fre pagal ni Timothy fithingan! Eunice ni chitiningin nge Lois ni titaw rok e ur filew e “thin ni bay u lan fre babyor nib thothup” ngak Timothy ni fan ni nge “par ko tin nib riyul’ e thin” me “mich u wan’.” Mang angin ni yib riy? Re sukul nem nib ga’ fan e ke ayuweg ni nge yog e gonop ngak me thap ngak Got.—2 Timothy 1:5; 3:14, 15.

Ku aram rogon e ngiyal’ ney, gallabthir ndabi “chalbarad i ngongliy e ngongol nib fel’” e ra yog e tow’ath ngorad nfaanra dabra “paged” yad. (Galatia 6:9) Yog Solomon ni Pilung nib gonop ni gaar: “Chitamangin be’ nib mat’aw e ba’ tapgin ni nge falfalan’.”​—Proverbs 23:24.