Ke Ge Ko Kireb

“MANG ni kam pag e re pilis nem be yog e thin nib kireb ngom? Mol’igeg nggu wan gu th’ab k’angan.” I yog Abishai e pi thin ney ni ir e ga’ ko pi salthaw u Israel. I fulweg ni aram rogon ni bochan ni ke yib e damumuw ngak ko ngiyal’ ni yog Shimei, ni reb e girdi’ nu Benjamin, boch e thin nib kireb ngak e Somol rok, ni David ni pilung.​—2 Samuel 16:5-9.

Lem rok Abishai e bod rogon ni yima lemnag e ngiyal’ ney—ni ngan sulweg e nifiy ko nifiy. Arrogon, baadag Abishai ni nge gafgownag i Shimei ni bochan e thin nib kireb ni yog ngak David.

Machane uw rogon e lem rok David? I taleg David Abishai me yog ngak ni gaar: ”Mpaged ngi i yog e thin nib kireb.” Yugu aram rogon nde riyul’ e pi thin rok Shimei, machane i par David nib sobut’an’ ma de pag ni ngan wawliy ni nge fulweg taban. Ya ke pag ni nge fulweg Jehovah taban.​—2 Samuel 16:10-13.

Nap’an ni ke sul David me mang e pilung biyay u tomren ni ke mil rok fak ni ke togopuluw ngak, ma Shimei e ir bin som’on e girdi’ ni ke yib ni nge guy me wenig ni nge n’ag fan e kireb rok. Biyay ma baadag Abishai ni nge li’ Shimei ngem’, machane de pag David ni nge li’.​—2 Samuel 19:15-23.

Ngongol ni tay David e bod rogon Jesus Kristus ni yoloy apostal Peter boch e thin u murung’agen: “Faan nog e thin nib kireb ngak ma de ta’ puluwon ni thin nib kireb . . . machane me pag fan urngin ban’en ngak Got ni ir fare Tapufthin nib mat’aw.”​—1 Peter 2:23.

Ngiyal’ ney ma yima yog ngak e pi Kristiano ni ngu “um pired nib fel’ e thin romed ngomed ma ba sobut’ lanin’med ngomed . . . Dab mu puluwniged e tagan.” (1 Peter 3:8, 9) Faan gad ra folwork rok David nge Jesus Kristus, ma aram ma rayog ni ngad “gigeyed e kireb nge gel ngodad, ma ngad ngongliyed e ngongol nib fel’ ngad gel ngak e kireb.”​—Roma 12:17-21.