Mu Poyed E Babyor U Taabang E Bitir Romed

Rogon ni yog fare babyor nu Brazil ni Veja, ma bitir ni gallabthir rorad e yad e ta poy e babyor e yad ra adag ni ngar poyed e babyor ko tin ni baaram e bitir ni gallabthir rorad e de dag e kanawo’ rorad ko poy babyor. Martha Hoppe, ni ir e togta ko bitir e ke gaar: “Ra par e gallabthir nge bitir u taabang mi yad poy e babyor ma aram e ra gel e fel’ u thilrad ma ra ayuweg e bitir ni ngar nanged fan e tin ni yad be fil ko babyor.”

Faanra ngam poy e babyor nga but’ me rung’ag e bitir rom ma aram e rayog ni ngam pi’ e fulweg ko deer rorad. Rayog ni ngam weliy u murung’agen e pi sasing ni bay ko n’en ni gimed be poy. Be gaar Hoppe: “Ra fel’ rogon ni be nang fan e bitir e n’en ni be poy u lan e babyor ma aram e ra pi’ e athamgil nga laniyan’ ni nge poy e babyor u nap’an ni bay ban’en ni ba adag ni nge nang.”

Boor e piin gallabthir ni yad e Pi Mich Rok Jehovah e yad ma poy e babyor u taabang e bitir rorad mi yad falfalan’ ngay. Yad ma poy e pi babyor ni baaray ni Babyor Rog ni Chep nu Bible, nge Listening to the Great Teacher, nge The Greatest Man Who Ever Lived.a Pi babyor ni aram rogon e ma ayuweg e bitir ni ngar salapgad i poy babyor maku ma ayuwegrad ngar adaged ngar filed e bin th’abi gilbuguwan e babyor​—ni aram e Bible nib Thothup. Ere faanra gur e gallabthir ma ga tay e kanawo’ ko bitir rom, ma ngam poy e Thin Rok Got u fithik’ e pasig. (Joshua 1:7, 8) Ma ngam athamgil ni ngam poy e babyor ngar rung’aged!

[Boch e Thin nra Tamilangnag Murung’agen]