Fare Gonop ni “Ngan Nang ko Mang era Buch Nga M’on”
“YAD e girdi’ ni ke kireb e thamtham rorad ma dakuriy e gonop rorad. Faanra yad e piin ni yad ba gonop, ma yad manang e re ney ma rayog ni ngar nanged ko mang era buch ngorad.”—Deuteronomy 32:28, 29, Beck.
Aram boch e thin ni i yog Moses ngak piyu Israel u nap’an ni yad be par u mathilin ko fare Binaw ni kan Micheg. Ke yog Moses ngorad ni ba yib e tayim ni yad ra pag Jehovah ma gathi ri yad ma lemnag ko mang wenegen ni ra yib riy ngorad nbochan e pin’en ni kar rin’ed. Nap’an e bin migid e chibog, ma piyu Israel—nib muun boor e pilung ngay —e kara dariyfannaged rogon ni ke ginangrad.
Susun, manang Solomon fare motochiyel ni dabni leengiy be’ ni ma liyor ko liyos ma gathi Jehovah. (Deuteronomy 7:1-4) Machane, ke leengiy “boor e ppin nu bang.” Ma angin riy? Fare thin nu Bible e be gaar: “Chirofen nem ni ke pilibthir Solomon ma pi ppin rok e kara chefeged gum’ircha’en nge fol ko yugu boch e got; ma de yog ni nge dag nib yul’yul’ gum’ircha’en ni fan ko Jehovah ni Got rok ma de bod David ni chitamangin.” (1 Kings 11:1, 4) Yugu demtrug ni ir be’ nib gonop, gathi rib llowan’ nrayog ni “nge nang ko mang era buch’ ngak nfaan ra th’ab e motochiyel rok Got.
Ma uw rogon gadad? Rayog ni ngada paloggad ni ri dabi kireban’dad nfaanra ngada lemnaged nib fel’ rogon um’on ni ngada turguyed ban’en nib m’ag ko par rodad. Susun, piin ni kristiano e kan pi’ e fonow ngorad ni ngara “pithiged [yad] u urngin ban’en ni ma alitnag e dowef nge lanin’uy.” (2 Korinth 7:1) Aram e thin nib gonop, machane gathi urngin e girdi’ e yad ba llowan’ ni ngar nanged e n’en ni ra buch nfaanra ngar dariyfanniged e fonow ni yog Paul. Susun, boor e piin ni fel’ yangarrad ni ma alitnag dowrad ko tamago, ni yad ma lemnag ni aram e kanawo’ ni nge m’ug ni yad e girdi’ nib llowan’ u fayleng nge kar ilalgad. Rib kireb, ya tomren ni ke yan boch e rran, ma ra yoor e girdi’ ni ra moy rok e m’ar ko gum’ircha’rad, nge lung cancer, ara emphysema ni bochan!
Ri baga’ fan ni ngan lemnag nib fel’ rogon u m’on ni ngam turguy ban’en nge n’en ni gara rin’ ni ngam nang ko mang era buch riy ngom. Tin nib fel’ i lemnag paul, me yoloy: “Demtrug ko mang e n’en ni be yung be’, ma ra t’ar wom’engin. Bochan be’ ni ma yung ban’en rogon ni be ararnag downgin ma ra t’ar wom’engin nib kireb, ma ra kirebnag downgin, machane fa en ni ma yung ban’en nib puluw ko lem rok Got ma ra t’ar wom’engin ni aram e yafas ni manemus ni yib rok Got.”—Galatia 6:7, 8.