Tin ni Nge Pow’iy Rogon ni Ngan Mel’eg Ko Mini’ e Ba Fel’ ni Ngan Chag Ngak

PIIN nib fel’ yangaren e ma sap ngak e piin ni yad taabyangar, ma gathi ngak e gallabthir rorad, ni ngar pow’iyed yad ko rogon e munmad nge musik ni ngar uned ngay, arrogon e n’en ni yog ko fare Reader’s Digest. Arfan ni ri baga’ fan ni nge nang e gallabthir ko mini’ e ma chag e pi bitir rorad ngak nge u uw.

“Mil fan ngomed ni ngam fithed yad,” be gaar Esmé van Rensburg, fa en ni ke par nib n’uw nap’an ko maruwel rok ni ir reb e sensey ko fare department of psychology u South African university. Me ulul ngay ni gaar: “Sana ra damumuw e bitir romed ngomed, machane ku ra m’ay e re n’ey.” Ngemu’ ke pi’ boch e thin ngak e pi gallabthir. Fapi motochiyel ni ngan pi ngorad e susun aram e motochiyel nib mat’aw mab puluw; ngam motoyilgad ko bitir romed; dabmu puwan, machane ngam par nib gapas lanin’um, ma ngam nang ko mang e ga ra yog. Faanra ke pirieg e bitir rom reb e tafager rok nib kireb, gathi ke mus ni ngam mogned ngak ni dabki chag ko cha’ nem biyay machane ngam tamilangnag ko boch e ngongol nib kireb ni ke af ngak nbochan.

Boch e fonow nib fel’ ni fan ko pi gallabthir e ke n’uw nap’an ni bay ko Thin rok Got, ni aram e Bible. Susun, be gaar: “Thingara gurgad ko motoyil, machane dabra gurgad ngar welthingad, ma dabra gurgad ngar damumuwgad.” (James 1:19) Ku Thin nu Bible e ke pi’ boch e fonow nib fel u rogon ni ngan mel’eg e piin nib fel’ ni ngan chag ngorad: “Fa en ni ma un ko piin nib gonop ni yog e gonop ngak, machane fa en ni ma chag ko girdi’ ni balyang ma ra gafgow.” (Proverbs 13:20) Pi thin n’ey e be dag rogon ni ke yib e gonop ngak e girdi’ ni ma bieg e Bible u fithik’ e felfelan’ ma ma fol riy u gubin e rran.