“Faanra Chuw e Buday ko Sol”
KAN cham ni bochan. Ma kan fanay ni ngan pi’ puluwon ban’en. U China kakrom, ma kari mus ni gol e kab ga’ fan ngak. Arrogon, sol e ban’en ni ri baga’ fan ko girdi’. Ke mada’ ko chiney ma yima yog nib falay, ma yibe fanay u ga’ngin e fayleng ni nge fl’eg lamen e ggan ma nge ayuweg ndabi kireb.
Bochan ni rib fel’ e sol ma rayog ni ngan fanay ko boor ban’en, ma dabni gin ngay ni be weliy e Bible u murung’agen u rogon ni be yip’ fan ban’en. Susun, fare Motochiyel rok Moses e ke tay chilen ni ngan tay e sol ko urngin ban’en ni ngan pi’ ni maligach ku Jehovah. (Levitikus 2:13) Ma gathi kan rin’ e re n’em ni ngan fl’eg lamen e pi maligach, ya sol e be yip’ e fan ni dabi wod ara mel.
Nap’an ni pi’ Jesus Kristus fare welthin u daken fare Burey me yog ngak e pi gachalpen ni gaar: “Gimed bod e sol ni fan ngaK urngin e girdi’ nu fayleng.” (Matthew 5:13) Ke yog Jesus e re thin ney ya nge tamilangnag ni machib ni yad ra tay u murung’agen Gil’ilungun Got e ra ayuweg e yafos ko piin nra rung’ag. Ma riyul’ ni piin ni ma fol ko n’en ni yog Jesus e ran ayuwegrad ndabra kirebgad ko ngongol nib kireb ma dabra wodgad ko tirok Got ban’en u nap’an ni yad be par u fithik’ e girdi’ ko binaw rorad.—1 Peter 4:1-3.
Machane ki’ ginang Jesus ni gaar: “Machane faanra chuw e buday ko sol, . . . ma dakury fan; ma aram min n’ag nga daken e but’ ngi i yan e girdi’ u daken.” Ke weliy Albert Barnes ni ir e Bible scholar u murung’agen e re n’em me yog ni fare sol ni manang Jesus nge pi apostal rok e “de machalbog, ya ba maathuk ko yasey nge but’.” Ere faanra chuw e buday ko sol, ma “rayog ni nge magay e but’ ni boor riy.” Miki yog Barnes: “Ma aram e dakury fan . . . ma ke mus ni ngan fanay ni ngan nin’ nga daken e kanawo’ ni bod rogon ni gad ma fanay e mak’yung.”
Ere susun ni nge fol e Kristiano ko re n’ey mar ayuwgad ni dabra talgad i machibnag e girdi’ fa ngar sulod ko ngongol nib kireb ni kar rin’ed faram. Ya ra danga’ ma yad ra wod ko tirok Got ban’en ma yad ra mang ban’en ni dariy fan ni bod e ‘sol ni chuw e buday riy.’