Ngan Thabthabelnag e Maruwel nge Toffan

“TOFFAN aram ba mad nib gamog, machane dabiyog ni ngan chuw ngay u gubin ngiyal’.” Aram e n’en ni yog be’ u murung’agen e toffan ni aram ban’en nib t’uf. Machane ki dag ni susun ni ngan thabthabelnag ko maruwel.

I weliy Solomon u murung’agen e re n’ey u lan e Bible. Re pilung ney nib gonop e ke tamilangnag ni bay l’agruw ban’en ni ngan siyeg. Som’on e gaar: “Fa en nib manan’ e be tay baraba’ i pa’ nga daken baraba’ i pa’ ma be kay e ufin rok.” (Eklesiastes 4:5) Arrogon, be’ nib malmal e ra par nib gafgow. Ma wenegan nra yib riy e rayog ni nge m’ar fa en nib malmal, ma rayog ni nge yim’. Ma n’en nib math keru’ ko re n’em e piin ni ma pag urngin ban’en ni fan ko maruwel nib pag rogon. I weliy Solomon ni maruwel nib pag rogon e “mm’ay fan ma gowa yibe lek e nifeng.”​—Eklesiastes 4:4.

Ere yog Solomon ni ngan thabthabelnag fagali n’en nem ni gaar: “Kab fel’ e toffan ni buch uw ko maruwel nib pag rogon nib m’ay fan ma gowa yibe lek e nifeng.” (Eklesiastes 4:6) Susun ni nge “yib angin nib fel’ ngak be’ ni bochan e maruwel ni ke tay nib elmirin”​—ma aram susun ni nge toffan boch ni fan ni nge falfalan’ ko tin ni ke yog ngak ni bochan e maruwel ni ke tay. (Eklesiastes 2:24) Ma susun ni ka bay boch ban’en ko yafos ma gathi ke mus ni maruwel. Ya bay rogon girdien e tabinaw rodad ni ngad pared boch rorad. I tamilangnag Solomon ni pigpig ku Got aram e n’en nth’abi ga’ fan, ma gathi maruwel. (Eklesiastes 12:13) Gur bagayad e piin ni be par nib falfalan’ ya kar pared nib thabthabel e yafos rorad ko maruwel?