Gapas u Fayleng Uw Rogon?

KE CHUCHUGUR ni nge yib e gapas, fa? Boor e girdi’ ni ma lemnag ni aram rogon kafram ma ke maruwaran’rad e chiney. Reb e report ni be weliy murung’agen e pi magawon ni bay yib nga m’on, ni kan ta’ nga Daily Mail & Guardian u South Africa, e be gaar “tin ni kan weliy u lan 10 e duw ni ke yan e gowa ke m’ay e tamilang riy e chiney.”

Piin ta yol e be dag ni ragag e duw ni ke yan ma kab gel e lem ko girdi’ ko athap rorad nga m’on. Kefin ni m’ay fare mahl ni ka nog Cold War ngay, ma dakuriy e cham u thilin e am ni rib gel gelngirad. Bochan ni ka nog nra tabab e ngiyal’ nib biech, ma be lemnag boor e girdi’ ni ra tabab e girdi’ ni ngar rin’ed boch ban’en ni ngan pithig e magawon ko piin nib gafgow, nge liliy, nge magawon nib m’ag ko urngin ban’en ni bay u toobdad. Ke ulul fare report ngay ni gaar, “Fapi thin ni kan weliy ni bay yib nga m’on nib fel’ e ke aw nib m’ay fan e chiney”. Miki gaar, “Ke tabab e mahl u yu yang ni daworda nanged; ma be yoor e piin nib gafgow u fayleng i yan. Bay l’agruw e nam ni bay e talin e cham rorow ni ka nog nuclear powers ngay. Ke war e pagan’ ko girdi’ ko UN nbochan ni gathi ri ma yib angin ngorad ma be yoor i yan e magawon ko girdi’. Kafram e yima lemnag nrib fel’ ma ke thil e chiney ya yibe lemnag ni daki fel’.”

Piin ni yad ma fil e Bible e kara nanged ni maruwel ni ma ta’ e girdi’, nyugu demtrug feni fel’, e dabi yib angin ni polo’. Mang fan ni danga’? Ya bochan rogon ni yog e Bible ni gaar, “ma tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Bochan ni ka bay Satan ni be gagiyegnag e fayleng, ma dabiyog ni ngan sulweg nga rogon nge mang Paradis nib puluw ko tin be finey Got u nap’an ni ke sunmiy e fayleng.

Ku arrogon, bay fan ni nga ni lemnag ni ka bay e tin nib fel’ nga m’on. Ke micheg Got ni Jehovah ni bayi fek e gapas i yib nga fayleng ni polo’, ni gathi bochan e ran yal’uweg boch ban’en ko re fayleng n’ey, ya ra sunmiy “fa bin nib biech e fayleng” ni “tin nib mat’aw e ngongol e bay i par riy.” (2 Peter 3:13) Arrogon, bochan e ayuw ko Gil’ilungun Got, ma ra thil e re fayleng rodad ney nge mang reb e tabinaw ni ba gapas mab falfalan’, ma gubin ngiyal’ e bay e falfalan’ ko yafas nge maruwel ko urngin e girdi’ ni ma fol. Maku, ke micheg Got ni “bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” Pi n’ey ni kan micheg e de m’ag ko thin ni ma yog e girdi’ ko tin ni bay nga m’on ni de mudugil. Machane, aram e n’en ni yib ko Thin rok e en Tasunmiy ni der ma oloboch, ma der ma ban.​—Revelation 21:4; Titus 1:2.