Uw Rogon ni Ngar Togopuluwgad ko Towasar Rok e Piin ni Taabyangar Rorad

FARE lem ni yi baadag ni ngan rin’ e tin ke yog yugu boch e girdi’ e ir e ke k’aringrad ni ngar folgad ko lem nge tin ni be rin’ e piin ni yad taabyangar. Baga’ ni piin ni fel’ yangaren e rib t’uf rorad e lem nib mudugil ni rayog ni ngarogned e danga’ ko pi ngongol nib kireb, ni bod e drug ni ke pag rogon nge ngongol ni darngal. Uw rogon ni ngar togopuluwgad ko piin ni yad taabyangar ni be towasariyrad?

Dawori n’uw nap’an ni ke yoloy l’agruw e rugod u Poland ni kar gaargow: “Nifingin e fayleng e yibe guy nib tamilang u fithik’ e piin ni gamad taabyangar. Yad ma sasalap u nap’an ni yad be un ko skeng u skul, yad ma yog e thin nib alit, ma yad baadag e mad ni boor e girdi’ ni be fanay nge musik ni ba wagey ma thin riy e ba sorfan ko ngongol ni darngal. Ri gamow be falfalan’ ni bay boch e articles ni fan ngomad e piin ni fel’ yangaren ni be ayuwegmow ni dabi af ngomow e ngongol ko piin ni fel’ yangaren ni dar falfalan’gad ma yad e piin ni tatogopuluw!

“Dabiyog ni nga nog ko thin gelngin e falfalan’ romow nbochan e pi articles ko Watchtower ni ke skulnagmow ke tamilang u wan’mow e tin ba t’uf ko fel’yangaren ma bay fel’ngin. Fonow ni kan pi’ ngomow ni yib u Bible e ke pow’iy rogon ni nggu warow ni gamow be falfalan’ag Got ni Jehovah iyan. Ke mudugil lanin’mow ni pigpig ku Jehovah u fithik’ e yul’yul’ e ir eram e bin th’abi fel’ e kanawo’ ko yafas.”

Arrogon, piin ni fel’yangaren e rayog ni ngar togopuluwgad ko piin ni taabyangar rorad ni ma towasariyrad. Ran ayuwegrad “u rogon ni ngar gonopiyed ban’en,” ma piin Kristiano ni ka ba fel’ yangarrad e rayog rorad ni ngar dugliyed ban’en nib dar ko “fare nifingin e fayleng” ya mm’ag ko “fare Kan ni Thothup ni yib rok Got.”​—Hebrews 5:14, New World Translation; 1 Korinth 2:12.