Rayog Ko Teliw Ni Nge Yibnag E Gapas Nga Fayleng?
RO RRAN ni August 28 nge mada’ ko August 31, ko duw ni 2000, ma ke pag 500 e girdi’ ni kar bad ko fa 73 e nam ni kara muulunggad u New York City. Kara muulunggad u taabang ko fare United Nations ni fan e ngar weliyed e “The Millennium World Peace Summit of Religious and Spiritual Leaders.” Ma fapi tayugang—e boor i yad e kar m’aged lolugrad ko pi turban rorad, ma boch e kar chuwgad ko mad rorad nib n’uw nib moguchol ramaen, ma kar m’aged lolugrad ko tabon e mad ni kan ngongliy ko bunuen e gamanman, ara kar m’aged nga dowrad tabon e mad nib n’uw mab talumor—e ke dag e pi n’em ni pow ko teliw nge boor mit e michan’. Mab muun ngay e Baha’i, nge Buddhism, nge Hinduism, nge Islam, nge Jainism, nge Judaism, nge Shinto, nge Sikhism, nge Taoism, nge Zoroastrianism, nge pi yuraba i teliw ni ka nog e Christendom ngorad.
Pi cha’ nem e kar muulunggad ko fare United Nations u nap’an e bin som’mon nge fa bin l’agruw e rran ko fare muulung rorad ni aningeg e rran n’umngin nap’an. Machane, gathi fare United Nations e ke yarmiy maku de pi’ e salpiy ngay ya yugu boch e ulung e kar ayuweged. Yugu aram rogon, ma fare UN nge fapi tayugang ko pi yuraba i teliw e kara uned i weliy murung’agen feni ga’fan ni ngara maruwelgad u taabang ni fan ni ngan thang e magawon ni bod e gafgow, nge ramaen dowey, nge environmental problems, nge mahl, nge fapi talin e cham ni yima li’ e girdi’ riy ni boor.
Mar sayingad ko fare babyor ni fithingan e “Tin ni Kan Micheg ni Fan e Nge Aw e Gapas nga Fayleng.” Yugu aram rogon ni yad ma nang ni bugel nge mahl e “yu ngiyal’ e kan ta rin’ u fithingan e teliw,” ma fare babyor e gaar pi cha’ nem ni kar sayingad ngay e “ngar uned ko fare United Nations nguu maruwelgad u taabang . . . ni fan ni ngeb e gapas.” Machane, dariy ban’en ni kan weliy nib tamilang ko uw rogon ni ngan rin’ e re n’em.
Bin l’agruw e rran, me Bawa Jain, ni ir fare secretary-general ko re muulung nem, e ke weliy boch ban’en u nap’an ni ke chuchugur ni nge m’ay e welthin rok ni gaar in e duw kafram ma ke guy ban’en ni kan achey ni kan ta’ nga naun ko fare United Nations. Fare painting e be dag yaan be’ ni pumoon nib n’uw ko fare naun ko United Nations ni ka nog Secretariat building ngay. Re liyos nem e yaan be’ ni be tugtuguy fare naun ni gowa ereram e mab riy. Ma immoy e yol ni kan tay nga tan fare liyos ni gaar: “Fak e Pilung ko Gapas.” Me yog Mr. Jain ni gaar: “Ri bay ban’en ni ke rin’ [fare sasing] ngog ko chi ngiyal’ nem ni ku gu’. Boor e girdi’ ni kug fith ngorad [ko] mang fan e re n’em. Ku gu lemnag ni daba’ e kafin gu nang e fulweg riy. Bochan ni kam bad ngara’ ni gimed e pi tayugang ko tirok Got nge pi tayugang ko pi yurba’ i teliw u fayleng ma gimed be muulung u taabang, e gu be lemnag ni [biney] e be dag ni ereram fare fak e pilung ko gapas ni be tugtuguy e mab ko fare United Nations.”
Ma Bible e be dag ban’en nib thil ko biney. Be dag ni Jesus Kristus e ir fare Fak e Pilung ko Gapas. Ra fek e gapas i yib nga fayleng, ni gathi bochan e maruwel ni ra tay e pi tayugang ko am nge pi yuraba’ i teliw, ya daken Gil’ilungun Got. Ereray fare Gil’ilungun—ni ir fare am ku Got nu tharmiy—ni bay gelngin ni nge taareban’nag e girdi’ ni ma fol ma ra n’igin ni nge lebug e tin nib m’agan Got ngay u roy u fayleng.—Isaiah 9:6; Matthew 6:9, 10.