Ga Be “Fanay e Tayim ni Ke Mab e Kanawo’ Ngom”?
PAUL ni apostal e ke fonownag e piin Kristiano u Efesu ko fa bin som’mon e chibog: “Ere um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’, ya tiney e rran e mmo’maw.” (Efesus 5:15, 16) Mang fan nib t’uf e re fonow ney? Ba t’uf ni ngan nang e magawon ni keb ngak e pi Kristiano kakrom ma aram rayog ni ngan nang e fulweg ko re deer nem.
Yim nang ni Efesus e ir bbinaw nib fel’ rogon, ma kar uned e ngongol ni darngal, mab sug ko bugel, ma yad ma un ko ngongolen e moonyan’ nib boor mit. Maku, pi Kristiano nu rom e susun e ngar athamgilgad ni dabra uned ko machib ni ma tay e girdi’ nib llowan’ u murung’agen e tayim. Piyu Greeks ni ur moyed u Efesus ni gathi yad e Kristiano e de michan’rad ni tayim e be mithmith ni be sor nga taab yang. Piyu Greek nib llowan’ e ur filed ngorad ni yafas e bod ban’en ni yugu ma sul u daken ni dabi mus. En ni i adbey e tayim rok u bayay e yafas rok e rayog ni nga ki yib biyay e pi tayim nem ni urngin u bayay e yafas rok ni bay kib ya be chelchel. Fare lem ni aram rogon e rayog ni nge k’aring e pi Kristiano nu Efesus ni ngar dariyfannaged e tayim ni ke ta’ Jehovah ni fan ko tin nra rin’ nib muun ngay e tayim ni ke tay ni fan ko rran ni pufthin nib thothup. Ere, fare fonow ni ke pi’ Paul ni ‘ngan maruwel ko tayim ni ke mab’ e kanawo’ e ba puluw.
De weliy Paul murung’agen e tayim ni gubin. Fare thin ni Greek ni ke fanay e be yip fan e tayim ni kan dugliy, ni aram e tayim ni fan ko taa ban’en ni ngam rin’. I fonownag Paul e piin Kristiano ko fa bin som’mon e chibog ni ngar fanayed e tayim ni ke mab ngorad u fithik’ e gonop, ara tayim nib fel’, ni yad be un ko falfalan’, u m’on ni ngeb e tomur ni aram e tayim ni dakuriy fare runguy nge fare athap ni ngan magay ni yib fas.—Roma 13:11-13; 1 Thessalonika 5:6-11.
Chiney e gad be par ko tayim ni taareb rogon ko re tayim nem. Piin Kristiano e susun dabra adbeyed e re tayim ney ni dabki sul biyay, ya yad ba gonop nfaan yad ra fanay e tayim ni bay rorad ni ngara rin’ed e “maruwel nib m’ag ko pigpig ku Got” ma aram ngari gel e tha’ u thilrad e en ni Tasunmiy, ni Jehovah Got.—2 Peter 3:11; Psalm 73:28; Filippi 1:10.