“Rriyul’ Ni Ke turguy Got ni Girdi’ Ni kireb E Nganiurfeg U Infierno?”
“Ga ma un ko skul ko theology?”
Re deer ney e gin Joel nge Carl ngay. Fagali pagal e—kara ognagew yow ni yow be maruwel ko tochuch ko Pi Mich rok Jehovah u Brooklyn, New York—yow be changar u fithik’ e babyor i yan u lan ba kantin ko babyor nib chuchugur ngorow. Nap’an ni be yaliy Joel e Bible ko gin yima gay e gin bay reb nge reb e ban’en riy u Bible, ma be weliy Carl ngak reb e n’en ni ku uni weliy ko machib ni rib adag. Ma bay be’ nib moon ni be sak’iy nib chugur ngorow me rungaag boch e n’en ni yow be yog, me gurn’ag ir ngeb ngorow.
Fare moon, e ka bay reb e ban’en ni be lemnag, gathi kemus ni nge nang ko gal pagal nem e yow ma fil e tirok Got ban’en fa danga’. Me fal’eg i weliy ni gaar: “Gu be’ u Jew, ma boch e fager rog ni Kristiano e karogned ngog ni yira urfegeg e girdi’ u infierno ni bochan e piyu Jew e ka ra n’aged Jesus. Re n’eney e ri be magawonnageg. Ba gechig ni aram rogon ni yib rok ba Got nib ta runguyey e ba dake de puluw. Ere rriyul’ ni ke turguy Got ni girdi’ ni kireb e ngan urfeg u infierno?”
Me yog Joel nge Carl ko re moon nib yul’yul’ ney ni yow be riyul’ ma ri yow baadag ni yow e girdi’ ni ma fil e Bible. Mar dagew ngak u Bible ni yam’ e dakuriy ban’en ni yad manang ara yad ra thamiy kara molod ni aram e kar m’ad ni yad be sonnag e fas ko yam’. Arfan, ni dabiyog ni ngar nanged e amith nib gel ara gafgow nib gel u infierno. (Psalm 146:3, 4; Eklesiastes 9:5, 10; Daniel 12:13; John 11:11-14, 23-26) Tomuren e welthin rorad ni 45-e minit, me yog fare moon e gin ma par riy ngak Joel nge Carl miki ning boch i murung’agen e re n’enem.
Faanra infierno e ba gawel ni yima gafgow riy nib gel, ma gur rayog ni nge yog be’ ni ngan pi’ e ngaram? Ya, fare patriarch i Job, e i finey ni nge i yim’ ni bochan ni nge chuw ko magawon nge gafgow ni be tay, me wenignag ni gaar: “Mini’ e ra pi’ ere n’eney ngog, ni nge yog ni ayuwegeg u infierno, nge mithageg nge taw ko ngiyal’ ni ke chuw e damuwmuw rom?” (Job 14:13, Douay Version) Ere rib tamilang, ni Job e de mich u wan’ ni infierno e bangi n’en ntagil’ e gafgow. Ya aram, e gini gay e ayuw i yan ngay. Yam’ e bangi yal’ ni dakuriy e chin’en ni yira rin’ ma infierno ni bay u Bible e aram e low ko yam.
Faanra ka ga baadag ni nga kumnang boch i murung’agen ko mang e ma buch rodad u nap’an ni gadad ra yim’ nge mang e athap ni bay nga tomuren ni kad m’ad, ma aram e ri gamad baadag ni nga gu pininged gur ko pi n’en baaray ni gamad be ognag.