Report Ko Piin Ma Wereg E Machib Ko Gil’ilungun Got

Ke Chuweg Got e Lu’ u Owchen

GIRDI’ ni kar thiliyeged e yafas rorad ke m’ag ko pi motochiyel rok Jehovah nge tin riyul’ e kar ni tawaathnagrad nib ga’. Yugu aram rogon ni tin baga’ fan ni ngar thiliyeged e de mom, machane bay e ayuw nge athamgilan’ ni rayog ngom. (Psalm 84:11) Bin baaray e n’en ni buch ku be’ u len ni Yimuch ni ngek u Asia e ra dag rogon re n’ey.

Nap’an ni fek reb e walag ni ppin e toffan rok u France mar nonow be’ ni bay e kantin rok ni Kima fithingan ni ur weliyew e n’en nib magan’ Jehovah ngay ni fan ko fayleng. Miki pi’ ku Kim baken fare babyor ni Rayog Ni Ngam Par ni Gab Fas u Paradis u Fayleng. Me yan Kim u fithik’ fare ke babyor, me ni pirieg fare bugithin ni, “ra chuweg urngin e lu’ u owcherad.” (Revelation 21:4) “Re bugithin ney e ri kan ngog,” ara e n’en nib ngan’ Kim. “Yima guyeg u kantin ni gu ma siminmin ma gu be non ko girdi’ ni kadbul nge mada’ ko balayal, mini’ e ra nang ni gu ra sul nga tabinaw rog, ma gu ma yor mfin gu mol?” Me weliy tapgin e kireban’, rok ni gaar: “Ugu pirew be’ nib moon ni ke gaman 18 e duw ni gu ma par ni ba kireban’ug ni bochan ni siyeg ni nge leengiyeg. Ma gu baadag ni nga gu museg e par ni aray rogon, ma bochan ni kagu pirew nib n’uw nap’an, ma dawori yog rog.”

De n’uw nap’an nga tomuren, me adag Kim ni nge fil e Bible ni yow reb e Mich rok Jehovah ni Linh fithingan. “Ma kari gurguran’ug ni nga gu rin’ e pi n’en be yog e Bible,” miki gaar, Kim. “Ni bod rogon, ni kagu tal ko liyor nge ta’fan ngak pi be’ rog ni kakrom ni kar m’ad, ni yugu aram rogon ni be togopuluw chon e tabinaw rog ngog. Maku reb e, gu guy rogon ni nga gu fal’eg babyoren e mabgol u court, ma cha’ ni gamow be par e dabun me siyeg ni nge rin’. Nap’an e re ngiyal’ i n’eney ni rib mo’maw ngog, ma fare Mich ni be’ u France e yugu be pi’ yu ken e babyor ni thin ko Bible be yib ngog, me Linh e ri be pi’ e athamgil ngog. Fan e gum’an’ nge ayuw u fithik’ e t’ufeg ko pi walag ni ppin ney e ke ayuwegeg nge yog ni gu par nge taw ko ngiyal’ ni gguy facha’ ni gamow ma par ko rib mit i mang girdi’. Mu gu pirieg ni ba’ 5 ‘e ppin’ rok ma 25 e bitir rok! Aray e n’en ni pi’ gelngig mu gu digey.

“Yira chuw u ba naun nib ga’ ma ba fel’ nib ayal e par riy ni ngani yan ni par nga bochi naun ni ba we’enin ma de mom. Maku reb, e facha’ ni kuugu pirew e ku be towasar ngog ni nga gu won nga kugu par rok bayay, ma kii k’aring e marus ngog nga i yog ni ra urfegeg nga ba mit i falay ni acid nge kireb yaag ni faanra dab gu sul. Ma bochan e ayuw rok Jehovah, me yog rog ni nggu rin’ e tin nib mat’aw.” Me ulul Kim nga i mon’og i yan mi yan i taufe ko April 1998. Miki un, l’agruw i walagen ni ppin ni reb e ba ilal ngak ma reb e ba bitir ngak nge fak nib pumoon ni ke fel’ yangaren ngar tababnaged e fol Bible ni yad e Pi Mich rok Jehovah.

“Ugu lemnag ni yugu bay i par ni dariy e athap ko yafas rog,” aray rogon ni yog Kim. “Machane, chiney e yug demtrug rogon, ma gub falfalan’, ma daku gur ma yor ni nep’. Jehovah e ke mu’ i n’ag e lu’ u owcheg.”

[Footnote]