Nge Fel’ u Wan’uy min Fal’falan’

“ROGON ni ma fel’ u wan’uy e n’en ni ke rin’ be’ ngom ni ka rim pining e magar riy e aram kenggin e n’en manang e girdi’,” aray rogon ni yog e Calgary Herald, ni ba simbung nu Canada. Fare Herald e sul u daken e n’en ni yog bogi bitir nu skul ni mereb e duw rorad ni yog e sensey rorad ngorad ni ngar yoloyed urngin ban’en ni yad ba falan’ ngay ni ri yad ma pining e magar riy u lanin’rad. Reb e pagal e gaar, rib falan’ ni be pining e magar ko tabinaw rok ni ‘bochan ni yad ma ayuweg.’ Ma reb e buliyel e ki yog ni ku be pining e magar ko tabinaw rok, ni gaar: “Yad ma tayeg ni dabi buch ban’en rog, ma ba fel’fel’ fithik’ i dowag nge lanin’ug, yad ma ayuwegeg, yad ma rungyeg, yad ma duruwiyeg, ma faan ma nga gathi bochan e gallabithir rog, ma dagu moy yu roy u fayleng.”

Faanra dariy ban’en ni yima felfelan’ ngay ma danir pining e magar u lanin’uy ma aram e yira par ni dariy ban’en ni ra fel’ u wan’iy. Rogon ni yog reb e philosopher-theologian ni J. I. Packer e gaar, “ni sunmiydad ni nge bagadad me taga’ nga daken bagadad.” Re n’eney e be puguran ngodad fare fonow nib fel’ ko Bible nni ngongliy bokun e chibog ni ke yan, ni faani gaar: “Um pininged e magar ngak Got u wan’med.” (Kolose 3:15) Ere faan yira pining e magar nge falfalan’ ni ke yib u gum’erchaey ngak e girdi’ ma aram e yibe ayuweg ni nge fel’ e tha’ u thiliyiy.

Maku reb, e faanra fel’ u wan’dad ma gadad ta’ fan e tin be rin’ bagadad, ma aram e ka gadad be pining e magar ngak Jehovah, ma ma guy e pi n’ey. Fare Bible e be gaar: owchen “[Jehovah] e yugu be chachangar u gaangin yang e fayleng i yan ni nge dag gelngin ni fan ngak e piin ba polo’ gum’ercharad ngak.” (2 Chronicles 16:9, New World Translation) Got e ke micheg ngodad ni be chaariy u wan’ e t’ufeg ni be ta’ e girdi’ nga fithingan. (Hebrews 6:10) Arrogon, bay tapgin nib fel’ ni nga uda pininged e magar ni bochan e ngongol nib fel’ ni yima dag ni gubin e rran, ni ma falan’ Jehovah ngay maku ma puthuy boch ko falfalan’ rodad. Ni bod rogon ni yog e Proverbs 15:13 (NW) ni gaar: “Ba gum’ercha nib falfalan’ e ba manigil ma ma m’ug u owchey.”