Henry VIII Nge Fare Bible

ULAN e babyor Rok ni History of the English-Speaking Peoples (Volume 2), me yoloy Winston Churchill ni gaar: “Michan’ ko yuraba’ i teliw e fare Reformation e thiliyeg nib gel. Fare Bible e chiney e kafin ni adag ma kan pirieg ni bay e fonow riy nib fel’ ma ba puluw ni ba’ rogon ni ra gagiyegnag boor ban’en. Tini kakrom boch e mfen e ur lemnaged ni pi n’en kan yoloy e ba thothup ma fare Bible e bay e riya’ riy ni faanra thap nga pa’ e piin ni dar skul gad ma kari mus ni goo pi priest e rayog ni ra bieged.”

Ka be ulul i yan: “Bible ni polo’ nni yoloy, min piliyeg ni thin ni Ngalis e yoloy Tyndal nge Coverdale, e yibi m’ug ni som’mon aray u tomuren e duw ni 1535, ma chiney e ke yoor ken ni kan fal’eg. I tay e Am chilen ko pi tayugang ko teliw ni nga ra gelgad ko girdi’ nguun poy e Bible.” U tomuren bokum miriay e duw ni dariy e tamilangan’ ko Bible nge pi nen bay riy, yu England e susun yad ba salap ma yad ma poy e Bible, machane ngan pining e magar ko am rok Henry VIII ma gathi galesiya.a

“Maku reb e n’en ni kub elmerin ni yib ko bin baaram e skul ni kakrom boch e pi’ e Am mat’awun yu Paris ni ngar ngonliyed e Bible ni boor ni boor ken ni thin ni Ngalis, nib fel ko tin som’mon nni ngongliy, me yan i taw ko pul ni September ko 1538 min motochiyelnag ni urngin e girdi’ nu Paris ni bay u lan binaw ma thingar i chuwiy baken e tin baga’ ken e Bible ni thin ni Ngalis, ni nge reb e galesiya, min tay baken ngay ko gini urngin e girdi’ ko re galesiya nem ma nge mom ngorad ni nguur poyed e re Bible nem. Ma n’el ken e ntay ko galesiya ni St Paul, ni ir e th’abi ga’ ni bay ko Mach nu London, ma boor ni boor e girdi’ ni i yan ko re galesiya nem nga u ra bieged e yuke Bible nem, ma ka nog ngomad, ni faan yira pirieg be’ ni rayog ni nge poy ngan rung’ag ma nge bieg nib ga’ laman.”

Ma bay e kireban’ riy, ya boor e nam, ni boor e girdi’ riy ni dara fanayed e tayim ni ba’ rorad nga ur poyed e Bible nib fel’ rogon. Re n’ey e rib ga’ fan ni ngan lemnag, ni bochan ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor, me ir e baga’ fan ya ma fil e tin nib riyul’ e thin ngodad, ma be yal’uweg e tin be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.”—2 Timothy 3:16.

[Footnote]

[Picture Credit Line on page 32]

Yaan Henry VIII: u lan fare Royal Gallery u Kensington, ni fek ko fare ke babyor ni The History of Protestantism (Vol. I)