Maruwel nib Fel’ e Ma Yog e Sorok Ngak Got

BOCHAN e ngongol rorad nib ffel’ nge maruwel rorad nib fel’, ma aram e pi Kristiano ni riyul’ e yad be yog e sorok ngak Got. (1 Peter 2:12) Re n’eney e rayog ni ngan guy ko n’en ni ke buch u Italy ko fa in ni baaray e duw ni ke yan.

U lan e duw ni September 1997, me yib ba durru’ ni rib gel u yuyang ko Marche nge yu Umbria, nge kirebnag ba chugur i 90,000 e naun. Boch e ulung ko Pi Mich rok Jehovah e ra gurgad nga ranod ra pied e ayuw ko tirorad e girdi’ nge ku boch e girdi’. Karro ni yima par riy, nge bogi tutuw ni yima mol ngay, nge stof, nge generator, nge ku boch ban’en nib t’uf e ra pied ngorad. Re maruwel ney nni tay ko ayuw e de yan i aw ni dan nang murung’agen.

Fare simbung ni Il Centro e ke yog ni gaar: “Piin ni som’mon ni ra tawgad ni kar feked e chugum i yib ni ayuw ko yungin baaram ni ke magothgoth ni bay e Pi Mich rok Jehovah riy nu Roseto [bangi nen u Teramo] . . . Piin ba yul’yul’ ko Jehovah e gathi kemus ni yad ma muulung nga ur meybilgad, ya ku yad ma maruwel u taabang ni ngar pied e ayuw ko piin ni kar gafgowgad, ni demtrug ko mang e teliw rorad.”

Fare mayor nu Nocera Umbra, ni reb e binaw ni rib gel e magothgoth riy, e yol ngak e Pi Mich ni gaar: “Ri gu be pining e magar ngomed u gum’irchaeg ni bochan e ayuw ni kam pied ko girdi’ nu Nocera. Gu manang ni gu be yog rogon e lem ko urngin e girdi’ nu rom.” Maku reb, e fare Ministry ko Interior e ke taw’athnag fare Congregazione Cristiana dei Testimoni di Geova (Ulung ko Kristiano ko Pi Mich rok Jehovah) nga bangi babyor ni be yog felngirad ma be pining e magar ngorad me pi’ ba medalia ni “nge micheg e maruwel ni kar ngongliyed nge ngongol ni kar daged nib elmerin ni bochan e magawon nib tomgin ni yib u Umbria nge yungi n’en nu Marche.”

Nap’an e October 2000, mi kib ba day nib elmerin nge gothey boch ban’en u Piedmont bangi n’en u len i aloch u Italy. Ma kub yay, Pi Mich e ku yad ba gur ni ra mithmithgad nga ranod ra pied e ayuw. Pi maruwel ney nib fel’ e ku de yan i aw ni dan nang. Re ngi n’en nu Piedmont nem e ku ra pied bangi nen plaque ngorad ni bochan e “maruwel ni rib fel’ ni ra ognaged yad ngar ayuweged e girdi’ nu Piedmont ni kar gafgowgad ko fare day.”

I yog Jesus Kristus ngak pi gachalpen ni gaar: “Ere ku er rogomed ni nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” (Matthew 5:16) Pi Mich rok Jehovah e ri yad be falfalan’ yad be yog e sorok ngak Got, ma gathi yad, ni bochan ni yad be fal’eg e “maruwel nib fel’” ni yad be ayuweg e girdi’ u toobrad ko tirok Got ban’en nge ku boch ban’en.