Dagathi Ka Yugu ni Pillibthir ni Ngan Fil Ban’en

KSENIYA e ni gargeleg ko duw ni 1897. Dalip e ppin ni fak, ma taareb e pagal, ma ragag nge lal pi tungin, ma 25 pi fak pi tungin. I par ni n’umngin nap’an e yafas rok ni ma rin’ e n’en i fil e gallabthir rok ngak ni nga i rin’. Yugu aram rogon ni yib nga Moscow ni ke mil u tafen ni bochan e mahl ni ke th’ab yu Abkhaz Republic, ni bay u thilin e Black Sea nge Caucasus, i par nib fel’ rogon e yafas rok u wan’, ni rib ga ni birok e michan’ ni ma yog ni michan’ ni yog ngak ko gallabthir rok.

Nap’an e 1993, me mang Meri ni fak Kseniya reb e girdi’ ko Pi Mich rok Jehovah. Me tabab Meri i weliy ngak Kseniya murung’agen Jehovah Got nge Bible, machane dabun ni nge motoyil. Yigi i yog Kseniya ngak fak ni, “Kaygi sowath ngog ni nga kug fil ban’en nib biech.”

Machane, fak ni Meri; nge ppin rok reb i pi fak tungin ni Londa; nge fak pi fak reb i tungin ni Nana nge Zaza, ni yigoo kar manged e Pi Mich rok Jehovah, e yugu u ra sulod nga ura weliyed murung’agen e Bible ngak. Meni reb e balayal’ ko duw ni 1999, ma ra bieged reb e thin u Bible ngak Kseniya ni bit nga gum’irchaen. Ba thin rok Jesus ni k’aring e pi apostal rok ni yad ba yul’yul’ u nap’an ni yibe fal’eg rogon fare abich ni Balayal rok Somol. (Luke 22:19, 20) Ke yan i gaman 102 e duw rok Kseniya meni reb e balayal’ me turguy u wan’ ni nge fil e Bible.

I gaar Kseniya, “Tomuren 102 e duw ni kugu par,” “Ma kafin gu nang ko mang fan e yafas. Chiney e kafin gu nang ni dariy ban’en ni kab fel’ ngay ni ngan pigpig ku Got rodad ni rib fel’, ma ba Got nib ta runguyey, ni Jehovah. Kugub pasig ma ka fel’ fithik’ i dowag. Ku rayog ni nga ugu poy e babyor ni dab gu tay e tiligiy ma kugub pasig ni gu ma chag ngak chon e tabinaw rog.”

Me yan i November 5, 2000, min taufenag Kseniya. Me gaar: “Chiney e nga gu pi’ e yafas rog ngak Jehovah ni aram e nga gu pigpig ngak u fithik’ e t’ufeg. Gu ma pi’ e babyor nge tracts ko ngiyal’ ni gu be par ko gin ni ma tal e bas riy u tooben e tabinaw rog. Pi be’ rog e bayi n’en mar bad ni ngar fingichiyed gag, ma ri gu ma falfalan’ ni gu ma weliy boch ngorad e tin riyul’ ni murung’agen Jehovah.”

Kseniya e be sonnag fare rran ni ‘downgin e bay ki fel’ rogon ni bod downgin e fel’ yangaren, me sul nga rogon ko pi rran ni baaram ni kab rugod ma kab fel’ downgin.’ (Job 33:25) Ere faanra be’ ni ke pag e 100 e duw rok ma dabi lemnag ni kaygi pillibthir ni nge fil ko mang fan e yafas u Bible, me ere gur?