Ba Fel’ u Wan’um e T’ufeg Rok Got?

FARE moon ni Job e bay biyay ni weliy murung’agen rogon e girdi’ ni de flont ko pi thin ni baaray: “Girdi’, ni gargeleg e ppin, e ba ngoch nap’an ni ma par ma ba sug ko wagey nge cham. Bod e floras ni puf miki mul, me yan ni bod fon ban’en me m’ay.” (Job 14:1, 2, NW) Yafas, ni pirieg Job ko ngiyal’ nem, nib sug ko amith nge kireban’. Kaa yib e lem ngom ni aram rogon fa?

Yugu demtrug rogon oren e mo’maw’ e magawon ni gad ra mada’nag, machane, bay ba athap ni rib mudugil, ni reb e athap nib mil fan nga daken e runguy nge t’ufeg rok Got. Bin th’abi som’mon, e Chitamangidad nu tharmiy nib tarunguyey e ke pi’ fare maligach ni biyul ni nge thang puluwon e denen, ni ke aw e girdi’ ngay. Rogon ni ba’ ko John 3:16, 17, e yog Jesus Kristus ni gaar: “Yi Got e rib t’uf [e girdi’] nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram dabkur m’ad, ya ke yog e yafas ndariy n’umngin nap’an ngorad. Yi Got e de pi’ Fak [Jesus] nge yib ngaray nga fayleng, ni nge turguy e gechig ko girdi’, machane ir e nge thapeg e girdi’ ngak Got.”

Maku arrogon ni ngam lemnag u rogon ni ma runguydad Got ni gadad e girdi’ ni dawori flont. I tamilangnag apostal Paul ni gaar: “Ri taareb e pumoon ni sunmiy, me sum rok e re moon nem girdien urngin e nam, me tayrad ni ngar pired u daken e re fayleng ney ni polo’. I ir e turguy ko tabolngin e re ngiyal’ i n’en nge yungi n’en ni ngar pired riy. I rin’ e re n’ey ni fan e ngar gayed ir, ma sana mi yad pirieg ko ngiyal’ ni yad be gayiy. Machane bin riyul’ riy e dariy bagadad nib mal’af Got rok nga orel.” (Acts 17:26, 27) Ayugu mu lemnag! Yugu aram rogon ni gadad e girdi’ ni dada flontgad, maku rayog ni ngaud falfalan’gad ko tha’ u thildad e eni ba tarunguyey ni Sunmiydad ni, Jehovah Got.

Ere rib pagan’dad, ni gadad be sap ko gabul nge langleth, ni gadad manang ni Got e ma lemnagdad ma fithik’ e t’ufeg e be pi’ e tin nib fel’ ngodad ni dabi m’ay. (1 Peter 5:7; 2 Peter 3:13) Ere rriyul’, ni rib ga’ fan, ni nga i gel i fil rodad murung’agen e Got rodad nib tarunguyey ni aram e ngad filed e Thin rok, ni fare Bible.