Ban’en ni Ngan Fil ko Fare Arche’ ni Stork

“MUS ko stork u lan e lang​—ma ri yadmanang ngal’an ni kan dugliy . . . Machane girdi’ rog, e dar nanged fare pufthin rok Jehovah.” (Jeremiah 8:7, NW) U daken e pi thin nem, i machibnag Jeremiah ni profet e pufthin rok Jehovah ni fan ngak e piin ni tatogopuluw nu Judah, ni kar digeyed Jehovah ni Got rorad mi yad pigpig ngak e pi got nu bang. (Jeremiah 7:18, 31) Mang fan ni i mel’eg Jeremiah fare stork ni fan ni nge fil ban’en ngak piyu Jew ni dar yul’yul’gad?

Piyu Israel, e yad ma guy e stork, ni baga’ nib wech wech u nap’an ni ngar milekag gad ko fapi binawen e Bible. Fithingan ni Hebrew e re arche’ ney nib n’uw ay ma ma yan u fithik’ e ran e aram fare thin ni ka nog e feminine form ngay ko fare bugithin ni be yip’ fan e “en nib yul’yul’; nge en ni bay e t’ufeg rok nib yul’yul’ rok.” Ba puluw e re n’en ney, ya de taareb rogon ko yugu boch e arche’, ya l’agruw e stork ni reb e pumoon nge reb e ppin e yow ra par u taabang u n’umngin nap’an e yafas rorow. Tomren ni ke par fapi arche’ ni stork ko fapi binaw nib gowel boch ma nap’an ni ke m’ay e winter u taferad, ma gubin e duw e baga’ ni ma sul bochi yad ko fare lafat rorad ni ur fanayed kafram.

Tin ma rin’ fapi stork e ri ma dag rogon felngin nib yul’yul’ u yugu boch e kanawo’ ni yira ngat ngay. Fagal stork ni pumoon nge ppin e yow ma ayuweg i gawelnag pi fakrow ma yow ma duruiy e pi bitir rorow u taabang. Fare babyor ni Our Magnificent Wildlife e be weliy ni gaar: “Fapi stork ni bay fak ara bitir rorad e baga’ ni ma dag ni yad ba yul’yul’. Reb e stork ni pumoon u Germany e ke changeg me aw ko fapi seng ko gamig u lang me yim’. Ma fare pin e ir e ke gawelnag e pi fakrow u lan 3 e rran, ma kemus ni taab yay ni ra pag tafen nib ngoch nap’an ni fan ni nge gay e ggan. . . . Maku reb, faani yira boyochnag fare stork ni ppin, ma fare pumoon e ir e ma ayuweg pi fakrow.”

Riyul’, nbochan ni fapi stork e ma dag nib yul’yul’ ko ppin ara pumoon rok ni n’umngin nap’an e yafas ma ri yad ma ayuweg e pi bitir rorad, ma aram ka ra lebguyed fan fithingrad ni​—“en nib yul’yul’.” Arfan ni, fapi stork e ma dag ban’en ni rib fel’ ni fan ngak piyu israel ni dar yul’yul’gad ma ba gelan’rad.

Rogon ni ma lemang boor e girdi’, e ngan yul’yul’ ma aram e lem ni ke kakrom​—ni ba fel’ machane dabiyog ni ngan rin’. Bochan boor e mabgol ni ke wer, nge yima pag ban’en, nge yima fanay ban’en u fithik’ e sasalap, nge yugu boch ban’en ni aram rogon e be micheg ni kan dariyfannag felngin e yul’yul’. Ban’en nib math keru’, fare Bible e ri be tayfan fare felngin ni ngan yul’yul’ ni t’ufeg nge gol e ke k’aring. Kari pi’ e athamgil nge laniyan’ e piin Kristiano ni gaar, “ngam mon’ed nga dakenmed e bin nib biech i gimed ni bod rogon e munmad, ni bin nib biech i gimed ni Got e sunmeg ni bod ir, ma ke gagiyel u daken e bin riyul’ e wok nib yal’uw mmat’aw ni ke yog ngomed.” (Efesus 4:24) Arrogon, fare wok nib biech e ra ayuwegdad ni ngad pared nib yul’yul’, machane ku rayog ni ngad filed ban’en ko stork.