‘Mu N’iged Fan u Wan’med e Ne’n ni Ke Rin’ Bigimed Ngak Bigimed ni Yib u Gum’irchamed’
BA MICH u wan’um ni ke n’ag Got fan e denen rom? U Meriken, ma be m’ug ni baga’ ni piin ni kar ilalgad e yad ma lemnag ni aram rogon. Dr. Loren Toussaint, ni ir e bin som’mon ni ke tababnag reb skul ni kan ta’ nga University of Michigan Institute for Social Research, e ke yog ni nap’an ni kan fith ngak e girdi’ nu Meriken ni 1,423 oren, ma gonapan 80 pasent ko girdi’ ni ke pag e 45 e duw rorad e ka rogned ni ke n’ag Got fan e denen rorad.
Machane, kemus ni 57 pasent ko girdi’ ni kan fithrad e ka rogned ni kar n’iged fan u wan’rad e kireb ko yugu boch e girdi’. Re statistic ney e be puguran ngodad ko thin rok Jesus fare Welthin ni tay u daken e Burey ni gaar: “Faanra mu n’iged fan u wan’med e kireb ni ke rin’ boch e girdi’ ngomed, ma ku arrogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dab mu n’iged fan u wan’med e kireb ni ke rin’ boch e girdi’ ngomed, ma ku arrogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matthew 6:14, 15) Arrogon, rogon ni ma n’ag fan Got u wan’ e denen rodad e ma taga’ nga daken boch ban’en, ni bang riy, e susun nge m’agan’dad ngay ni ngad n’iged fan e kireb ni ke rin’ yugu boch e girdi’.
Paul ni apostal e ke puguran ngak e Kristiano u Kolose murung’agen e re kenggin e motochiyel ney. I fonownagrad ni gaar: “Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin kam rin’ed nib togopuluw ngak.” (Kolose 3:13) Riyul’, de mom ni ngan rin’ ban’en ni aram rogon. Ni bod ni, nap’an ni ke yog be’ ngom e thin nib gel ara thin ni dan lemnag, ma mo’maw’ ni ngan pagtalin.
Yugu aram rogon, yira n’ag fan u wan’uy e kireb ni ke rin’ be’ ma ra yib angin ni boor. Dr. David R. Williams, ni reb e sociologist, e ke yog murung’agen ya ke fal’eg i gay ni gaar: “Kug pirieged ni ngan n’ag fan e kireb rok yugu boch e girdi’ e rib peth ko lem nib fel’ rok e girdi’ nu Meriken ni kar ilalgad boch nge piin kar pillibthirgad.” Ba puluw ni aram ko thin ni yog Solomon ni fare Pilung nib gonop, ni sogonapan 3,000 e duw ni ke yan e yoloy ni gaar: “Fare gum’ircha’ nib mocha’ e ir e yafas ko fare dowef.” (Proverbs 14:30) Bochan fare lem ni ngan n’ag fan e kireb ko girdi’ e ma mon’eg nge fel’ thildad Got nge thildad yugu boch e girdi’, ere ri bay fan ni ra bagadad ma nge n’ag fan rok bagadad ni yib u gum’irchadad.—Matthew 18:35.