“Mu Par ni Gab Gonop ko Yafas Rom Gabul nge Langlath”

“Ba chuchugur ni nge urngin e girdi’ e kara fanayed e tin som’mon e duw ko yafas rorad u reb e kanawo’ me par nib kireban’rad.” Ireray e n’en ni yog Jean de La Bruyère, ni be’ nu France ni tayol ko fa bin 17 e chibog. Riyul’, reb e fel’ yangaren ni be maruwaran’ ni nge mel’eg boch ban’en ni kan bing e kanawo’ ngak, me aw ni dabi fel’ rogon ma ke kalngan’. Ma ku reb e pa’, e en ni kab pagal nib gelan’ e ra yan ko kanawo’ ndariy e gonop riy, ma ra chuweg e falfalan’ rok u nap’an e tin tomur ko yafas rok. Demtrug rogon, ma bochan ni dan rin’ e tin nib mat’aw mab puluw ara bochan ni kan rin’ reb e oloboch ma ra pow’iyey ko yafas nib gel e kireban’ riy.

Uw rogon ni ngan siyeg e magawon ni aram rogon? Thin rok Got ni be ginang e piin fel’ yangaren ni nge dabra tururuwgad, be fonownagrad ni gaar: “Chiney e nga mu lemnag, e En ni Sunmiyem ni Th’abi Ga’ u nap’an ni ka gab pagal, u m’om ni dawori taw fapi rran ngom nib gel e gafgow riy, ara kam taw ko fapi duw ni ga ra yog ni ngam gaar: ‘Ke chuwan’ug ko pi n’en nem.’” (Eklesiastes 12:1, NW) Faanra gur e ka gab pagal, ma ngam rin’ ban’en ni fan ni ngam nang murung’agen e “eni Sunmiyem ni Th’abi Ga’.”

Ere, uw rogon ni nge ayuweg e Bible e piin fel’ yangaren ni nge siyeg e ngongol ko balyang? Be yog ni gaar: “Mu motoyil ko fonow ma ngam fol ko gechig ni be yaluwegey, ma rayog ni ngam ayuweg e yafas rom ko tin bayib gabul nge langlath.” (Proverbs 19:20, NW) Maku Bible e be dag nib tamilang ni piin fel’ yangaren nra dariyfannag e gonop rok Got nbochan ni dar tiyan’rad nga ban’en ara yad be togopuluw, ara demtrug ko in e duw rorad, ma ra yib angin ngorad nib kireb. (Proverbs 13:18) N’en nib thil riy, e ran fol ko motochiyel rok Got ma ra “n’uwnag e pi rran nge pi duw ko yafas nge gapas,” ni aram e yafas ni rib fel’ u wan’uy.​—Proverbs 3:2.