Gad Gubin Mab T’uf Rodad Boch e Tin ni Ka Nog ni Bochan e Tin ni Kad Rin’ed

REB e rran ni immoy nib fel’ u puluwon fare buliyel. Yugu aram rogon nib t’uf ni ngan yaluweg e cha’ nem u yugu boch e tayim, machane re rran ney, e kari llowan’. Machane, re nep’ nem, u tomren ni kan ta’ fare tir nga bet, me rung’ag e chitingin laman ni be yor. Nap’an ni ke fith ko mang fan ni ke kireban’, me fulweg ni be yor yor ni gaar: “Gathi gub llowan’ e daba’?”

Re deer nem e kari amithnag laniyan’ fare chitingin. Ya ma par nrib papey ni ma yal’uweg e bitir rok. Machane chiney, ni yugu aram rogon ni ke guy ni kari athamgil fachi buliyel rok ni nge llowan’, ma de yog rok ni nge yog bbugithin ni mus nga taareb e thin ma de yog ni be dag ni ke felfelan’ ko tin ke rin’.

Gathi kemus ni fapi bitir ni ppin e bat’uf ni nga nog boch e thin nib fel’ ngorad nbochan e tin kar rin’ed ma ngan micheg ban’en ngorad. Gad gubin ma bat’uf rodad e re n’em​—ni bod ni kub t’uf rodad e fonow nge ngan yaluwegdad.

Mang e gad ra thamiy u nap’an ni ka nog boch e thin nib fel’ u murung’agdad ni yib u gum’irchaey? Gathi ra felan’dad ma ra pasignag laniyan’dad? Baga’ ni gad ra thamiy ni bay be’ ni be guydad ma be lemnagdad. Re n’en ney e be micheg ngodad ni tin ni kad rin’ed e ri bay fan, ma ra k’aringdad ni nguud athamgilgad boch ni ngad rin’ed e re n’ey ney biyay boch nga m’on. Dabni gin ngay ni thin nib fel’ ni ka nog u murung’agdad u fithik’ e yul’yul’ e ra k’aringdad ni ngad chugurgad ngak fa cha’ ni ke tay e tayim ni nge yog boch e thin ni ra pi’ e athamgil nga lanin’uy.​—Proverbs 15:23.

Manang Jesus Kristus nib t’uf ni nga nog boch e thin nib fel’ nbochan e tin ni kan rin’ nib fel’. U lan fare fanathin u murung’agen fapi talent, me yog fare masta (be yip’ fan Jesus) boch e thin nib fel’ ngak l’agruw e sib nib yul’yul’, ni be yog ngorow ni bagayow nge bagayow ni gaar: “Rib fel’ rogon ni kam mu’nag, ye gur reb e tapigpig ni gab fel’ ma gab yul’yul’!” Ri ma falfalan’ ngay e pi thin nem! Yugu aram rogon nib thil thil e salap rorow nge tin ni kar rin’ew, ma taareb rogon e thin ni yog nib fel’ u murung’agrow.​—Matthew 25:19-23.

Ere dabda paged talin fa en chitingin fare buliyel. Dabda sonnaged ni ngada guyed be’ ni ke yor ma fin dogned e thin nib fel’ u murung’agrad ngorad. Tin gad ra rin’, e ngad maruweliyed ni ngad gayed e tayim ni nga dogned e thin nib fel’ u murung’agen e tin ni ke rin’ be’. Riyul’, ni bay tapgin nib fel’ ni nga dogned boch e thin nib fel’ ngak be’ nbochan e tin ni ke rin’ nib fel’ u urngin e tayim nrayog rodad.