Bin Th’abi Fel’ e Tayim ni Ngan Par nib Fas

NAP’AN ni keb e pi skeng ngom, ma ga ra tafinaynag “fapi rran nib fel’ ni ke yan”? Ere mu tiyan’um ko thin rok Solomon ni fare Pilung nib gonop ni gaar: “Dab mog ni ngam gaar: ‘Uw rogon me buch ni fapi rran ni ke yan e kab fel’ ko ti ney?’ ya gathi bochan e gonop e kam fith murung’agen.”​—Eklesiastes 7:10, NW.

Mang fan ni pi’ Solomon e re fonow ney? Ya bochan ni manang ni ra ngan changar ko tin ni ke buch kakrom e ra ayuweg rogon ni ngan mada’nag e pi magawon ko ngiyal’ ney. Piin ni ma tafinaynag ni “fapi rran nib fel’ ni ke yan” e sana kar paged talin ni ngiyal’ i nem e ku ke sug ko magawon mab wagey ma de fel’ e yafas riy. Sana boch ban’en ni buch kafram e ba fel’, machane baga’ ni danga’. Rogon e n’en ni naab Solomon ngay, e de fel’ ni nguuda tafinaynaged e tin ni buch kafram, yab tamilang ni dabiyog rodad ni ngad sulweged e par rodad nge bod rogon kafram.

Ba kireb nfaanra nguuda tafinaynaged e tin ni buch kafram? Arrogon, nfaanra dabkiyog ni nguuda puluwnaged e lem rodad ko par rodad e chiney ara dabkuuda pininged e magar ko tayim ni gad be par riy e chiney nge fare athap ni rayog ni nge riyul’ ni fan ngodad.

Riyul’, ni chiney ireray e tayim th’abi fel’ ni ngan par nib fas, nyugu aram rogon ni be yoor i yan e magawon ko fayleng. Mang fan? Ya bochan gad be chugur i yan ko ngiyal’ ni nge lebug e tin nib m’agan’ Got ngay ko fayleng rodad nge pi flaab nra yibnag Gil’ilungun nra gagiyeg u fithik’ e gapas. Be micheg e Bible ni gaar: “Ma bayi n’ag urngin e lu’ u owcherad. Ma aram e dab ku unim’, ma dabki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Revelation 21:4) Ma, bochan ni ngari fel’ e par ko girdi’ ko ngiyal’ nem, e dakuriy fan ni ngan tafinaynag e “fapi rran nib fel’ ni ke yan.”