U Tebel Rok fare Kapten

GIRDI’ nib fel’, nge ggan nib fel’ lamen, nge sabethin ni bay e falfalan’ riy e fal’eg rogon nge manigil fare abich u tebel rok kapten u daken e barkow. Machane ni weliy murung’agen ban’en ko tebel rok kapten Robert G. Smith, ko fare White Star Line, ni tamilangnag reb e abich ko tirok Got ban’en.​—Isaiah 25:6.

U lan e duw ni 1894, ni ke gaman e 24 e duw rok Robert, me mang ga’ ko fare barkow ni lay ni Kinclune of Dundee ni aram e nge yan ko bin som’mon e milekag rok ni nge liyeg e fayleng. Me taaboch me mang kapten ko barkow ko White Star, ni bod rogon fare Cedric, nge fare Cevic, nge fare Runic.a Nap’an ni th’ab e day ni Atlantic nga barba’ ni yi bu New York nga Liverpool, u England, ma daken reb e pi barkow ney, e pining Robert Charles Taze Russell ko abich ko tebel rok kapten. N’en ni u ra weliyew Russell murung’agen e p’ug bochi ban’en u laniyan’ Robert me adag ni nge nang e thin nu Bible, ma n’en ni ayuweg nga ki nang boch e adag ni nge fek rok Russell boch fapi babyor ni Studies in the Scriptures.

I par Russell ni yug be yol nga i pi’ e babyor, ma angin ni yib, e gel feni be adag Robert e thin u Bible. Ma aram mi i weliy Robert boch e tamilangan’ nib biech ni ke pirieg ngak e ppin rok. Ma de n’uw nap’an mar mangew l’agruw e Bible Students, ni aram fithingan e Pi Mich rok Jehovah e ngiyal’ ney, yow l’agruw ni yow ba pasig ko maruwel. Me taaboch riy me yib mat’awun Robert ni nga i pi’ boch e welthin ni fan ko yoor. Ni bod rogon, u Brisbane, ngo Australia, ni pi’ e welthin riy ni fithingan e “The Balm of Gilead” me dag rogon ni bay ko Thin rok Got ba thin ni bod ba “falay ni ra chuweg urngin e gafgow u fayleng.” Ma ppin rok nge pi fak ni ka yad bbitir, u England, e u ra pied e ayuw i dag fare kachido ni “Photo-Drama of Creation,” ni yad be cheleg ni kan rekodonag e welthin rok Russell ma yibe dag fa yungi sasing.

I pi’ Robert ngak pi fak e pi n’en ni yog ngak ko tin riyul’ ni murung’agen fare Gil’ilungun. Chiney, ni ke lal e mmfen nga tomur, ma 18 i chon e tabinaw rok e ri yad ba pasig i weliy ngak boch e girdi’ fare thin nib fel’, kari falfalan’ ko n’en nni pi’ ko fare tebel rok kapten.

U daken e pi babyor ni yad be yoloy nge maruwel rorad ni fol Bible, ma Pi Mich rok Jehovah e yad be ayuweg e girdi’ u gaangin yang e fayleng ni ngar filed e thin ni bay u Bible ni faani pug laniyan’ Kapten Smith. Ku arrogon gur ni rayog ni ngam pirieg e n’en nib mudugil nib ga fan ni m’ug ko fare tebel rok kapten.

[Footnotes]

[Picture on page 8]

Robert G. Smith

[Picture on page 8]

Charles T. Russell