“Kug Pirieg Urngin Ban’en nib T’uf Rog”
MOCHUCH, rogon ni yog reb e report ko fare World Health Organization, e yibe susunnag ni ke af ngak e girdi’ ni ke pag 120 million oren u ga’ngin yang e fayleng. Gubin e duw, ma taareb e million e girdi’ ni yad ma uchuliy k’angrad ma u thilin 10 nge 20 million e girdi’ e kar guyed rogon ni ngar thanged e fan rorad. Mang e ayuw ni bay ni fan ko piin ni kar gafgowgad ko mochuch? Yira fanay e falay ma rayog ni nge ayuwegey nge baud lanin’uy boch, ma baga’fan ni ngan ayuweg e emotion ara lem nib gel. Ma reb, e boch e girdi’ ni keb ngorad e magawon ni aram rogon e kar pirieged boch e ayuw u lan e pi babyor ko Pi Mich rok Jehovah ni kan fek u lan e Bible, ni bod rogon e n’en ni be dag reb e babyor ni keb u France.
“Dawori n’uw nap’an fram, ma dagur guy feni ga’ fan ni ngu ug par ni gub fas. Kug meybil ku Got ni nge pageg nggum’. Ya gowa gub yam’. Kug gay e ayuw ni ran pow’iyeg ko tin nggu rin’, ma aram e kug meybil nib gel ngak Jehovah. Maku kug dugliy ni nggu bieg fare 2002 Yearbook of Jehovah’s Witnesses ma kug mu’nag u lan dalip e rran. Ma nggog ni kari pi’ e athamgil nga lanin’ug ma ke gelnag e michan’ rog.
“Kug fal’eg i gay boch lan fare babyor ni Watchtower nge Awake! ma kug gin ngay nib gel! Gu ma bieg e pi babyor ney ni gubin ngiyal’ ni ke pag 15 e duw, machane dagu naab ngay ni ri ma pi’ e athamgil nga lanin’uy e pi article ney. Pi babyor nib sug ko t’ufeg—e reb e felngin ni mo’maw’ ni ngan guy ko ngiyal’ ney. Kug pirieg urngin ban’en nib t’uf rog.”
Bible e be yog ni gaar: “Jehovah e ba chugur ngak e piin ni ke kireban’ gum’ircha’rad; ma ra ayuweg e piin ni kari m’ing ngan’rad.” (Psalm 34:18, NW) Dariy e maruwar riy, ni urngin e girdi’ ni ke “kireban’ gum’ircha’rad” ara “kari m’ing ngan’rad” e rayog ni ngar pirieged e felfelan’ nge athap gabul nge langleth u lan e Bible. Pi Mich rok Jehovah e yad ma wereg boch e babyor ni ba puluw ko thin u Bible ni fan ni nge ayuweg e piin nib t’uf rorad me yib angin ngorad fapi thin ni Got e ke thagthagnag ni ireray e tabolngin e pagan’.