Rogon Ni Ma Sap Got Ko Yam’

RA YIM’ be’ nib t’uf ma rriyul’ ni ma kireban’uy. Dakuriy ban’en ni be l’agan’uy ngay, ma yibe tawreng, dakun nang e n’en ngan rin’ e dariy e fol riy. Yam’ ni ma tay be’ u tabinaw nib chuchugur e rayog ni k’aring be’ nge par ni dabkiyog ni rin’ ban’en, ya demtrug urngin e fel’ rogon ku be’, fa gelngin, ara gelngin ni nge suruyey, ma dariy be’ e chiney u fayleng ni rayog ni ngaki fulweg ba yam’ me fas.

Machane, ani Sunmiydad e ba thil rogon ni ma sap nga ban’en. I ngongliy e bin som’mon e girdi’ ko fiyath u but’, ere ku arrogon ni rayog rok ni ngaki sunmiy bayay be’ ni ke yim’. Ere ireray fan, ni Got e rayog ni i lemnag e yam’ ni gowa ka yad ba fas. Rogon e pi tapigpig nib yul’yul’ kakrom ni kar m’ad, e weliy Jesus ni gaar: “Ya rogon ni be guy [Got] e girdi’ e yad urngin ni yad ba fas.”​—Luke 20:38, footnote.

Nap’an ni immoy Jesus u fayleng, mi ni pi’ gelngin ni nga i faseg e yam’. (John 5:21) Arfan, ni ma sap ni bod e chitamangin ngak e piin ni kar m’ad ni yad ba yul’yul’. Ni bod rogon, ni faani yim’ e fager rok ni Lazarus, me yog Jesus ngak pi gachalpen ni gaar: “Bay gu wan . . . gu pug ni be mol nge od.” (John 11:11, NW) Ra sap e girdi’ ngay, me Lazarus e ke yim’, machane rogon u wan’ Jehovah nge Jesus, e be mol Lazarus.

U tan e gagiyeg rok Jesus, e bay e “fas ko yam’ ni piin ni mat’aw nge piin ni de mat’aw.” (Acts 24:15, NW) Ngiyal’ nem, e piin ni kan fasegrad e bay uni fil ngorad i yan e tirok Got me yog e athap ngorad ko yafas ni manemus u fayleng.​—John 5:28, 29.

Arrogon, ra yim’ be’ ni rib t’uf ma ra k’aring e mochuch nge kireban’ nib gel, ni rayog ni par ni boor e duw. Yugu aram rogon, yira nang rogon ni ma sap Got ko yam’ ma ra fal’eg lanin’uy nib gel me gelnag e athap rodad.​—2 Korinth 1:3, 4.