Ngiyal’ ni Tin Kan Micheg e Ri Ra Buch
CHEP e ba sug ko pi n’en ni yima micheg ma danir rin’. Pi nam e boor yay ni der ma yog rorad ni ngar folgad ko n’en kar micheged kar sayingad ni dab kur chamgad ngorad, ma aram rogon ma yad ma fek e girdi’ rorad ko mahl nib gel e kireb riy. Napoleon ba ngiyal’ e gaar: “Pi am e yad ma rin’ e tin kar micheged ni kemus ni faanra kan towasariyrad ni ngar rin’ed ni aram rogon, ara bochan ni yad e nge fel’ ngorad.”
Ma uw rogon e tin ni ma micheg be’ nge be’? Uw feni gel e kireban’ riy ni faanra dabi rin’ be’ e tin ke micheg ni nge rin’! Ni rib ga’ ni aray rogon ni faanra facha’ e be’ ni gamanang ni ma pagan’um ngak. Arrogon, girdi’ e reb e de yog rok ara degeeran ni nge rin’ e tin kar micheged.
Mang e ba’ nib thil u thilin e tin ma micheg e girdi’ nge tin ma micheg Got! Tin i ma micheg Got e rayog ni ngan taga’ nga daken ma ba’ fan ni ngan pagan’uy ngay. Demtrug e tin i ke micheg Jehovah Got ma ba mich ni ra buch. Rib riyul’ ni ra lebug. Isaiah 55:11 e be weliy murung’agen e thin rok Got nrayog nni pagan’uy ngay, (NW) ni gaar: “Ku aram rogon e thin ni ma yib u l’ugunag nib mudugil nib mich. Dabi sul ngog ni dariy angin, ya ri ra rin’ e tin gu baadag, ma ra rin’ nib fel’ rogon e n’en ni kugu l’og ni nge rin’.”
Ere, uw rogon, ni thingarda lemnaged e pi n’en ni ke micheg Got ni kan yoloy nga lan e Bible? Rib riyul’ ni rayog ni ngad taga’gad nga daken. Ni bod rogon, ni yoloy apostal John ni gaar: “Chiney! e keb i par tafen Got nga fithik’ e girdi’, bayi par rorad, ma bay ra manged girdien. Mi Got e bay i par rorad mi ir e bay i mang Got rorad. Ma bayi n’ag urngin e lu’ u owcherad, ma aram e dab ku unim’, ma dabki i kireban’uy ma dab ku un yor ma dab ku un amith. Ya tin kakrom ban’en e ke chuw.” (Revelation 21:3, 4) Rayog ni ngam falfalan’ ko tinem e towath ni faanra umu ngongol nib puluw ko thin rok Jesus ni gaar: “Baara’ ira e yafas ndariy n’umngin nap’an, ni aram e nge nangem e girdi’ ni kari mmus ni gur e bin riyul’ e Got mi yad nang ko mini’ Jesus Kristus, ni ir e kam l’og.”—John 17:3.