“Dabi Thil Malngin e Mat’ Rom”

BOD NI ga be guy u roy, fare kamel nge fare garbaw ni yow be gi’ e but’ u taabang e be m’ug ni der fel’ rogon. Fare mat’ ni ke chagiyrow​—e fen l’agruw i gamanman ni taareb ga’ngirow nge gelngirow—​ere be gafgow e gali gamanman nem. Be lemnag Got rarogon e pi gamanman nem ni kan mel’egrad, me yog ngak piyu Israel ni gaar: “Thingari dab mu chagiy ba garbaw ni pumoon nge dangki nga taabang ni ngar giew e but’.” (Deuteronomy 22:10, NW) Maku aram kenggin e motochiyel ni yira fanay nga ba garbaw ni pumoon nge ba kamel.

Rogon riy, e be’ nib tamilay’ e dabi ta’ e binem e gafgow nib gel ngak e gamanman rok. Ya faanra dariy l’agruw i garbaw ni pumoon rok, ma rayog ni nge m’ag nga taab mat’ l’agruw e gamanman ni ba’ rok. Ba gagiyel, ni piin tamilay’ u nap’an e bini 19 e chibog ni baaray ni be m’ug yaan e aray e n’en kar lemnaged ni ngar rin’ed. Bochan e ba thil ga’ngirow nge tomalngirow, ma bin ba war e gamanman e ra i gafgow ni be guy rogon ni nge taareb macharngirow, ma fa bin nib gel e ra gel boch e tomal ko n’en be fek.

Paul ni apostal e fanay fare fanathin nga ba mat’ ni de taareb malngin ni nge fil ngodad reb e skul nib ga’ fan. I yoloy ni gaar, “Dab mu guyed rogon ni ngam taab mat’gad e piin nde mich Got u wan’rad nguum maruwelgad utaabang nib taareb lanin’med, ya dabiyog.” “Ra diin me par e tamilang nge talumor u taabang?” (2 Korinth 6:14, NW) Uw rogon ma ba kireb rogon e mat’ rok reb e Kristiano?

Reb e kanawo’ e faanra be’ nib Kristiano ni mel’eg e ani leengin ara figirngin ni de taareb e michan’ rorow. Binem e mabgol e ra gafgownagrow, fa gal mabgol e dabi taareban’row ko tin nib ga’ fan ban’en.

Nap’an ni tabolnginnag Jehovah e mabgol, me pi’ ngak faen leengin e maruwel ni “nga i gamneg,” ara “nga i pi’ e ayuw.” (Genesis 2:18) Ku aram rogon, ni yog fare profet i Malaki, Got e ma yog be’ ni leengiy ni “be’ ni gimew.” (Malaki 2:14) Ani Sunmiydad e baadag ni ra ba wu’ e mabgol ma ngeb nga taabang ni taa ba kanawo’ ko tirok Got ban’en, muura ayuwegew yow ko pi magawon ma pi felngin ban’en e nga i yib ngorow nib puluw rogon.

Ra ngan mabgol ni “kemus nu lan e ulung rok Somol,” ma be dag fare Kristiano e ta’ fan ko fonow rok e Chitamangidad nu tharmiy. (1 Korinth 7:39) Re n’ey e aram e ke fal’eg e def ni fan ko mabgol nib taareb, ni rayog ni nge yibnag e sorok nge ta’ fan ngak Got ko ngiyal’ ni yow l’agruw ni yow be pigpig nga ni ‘bagayow ma be ayuweg bagayow’ nib thil rogon feni fel’.​—Filippi 4:3.

[Credit Line]

Kamel nge ox: Fare babyor La Tierra Santa, Volume 1, 1830