Ba Fayleng Gabul nge Langlath ni Dariy e Cham nge Bugel riy

AYUGUM lemnag, nfaan ma nga rayog rom, ba fayleng ni dariy e girdi’ ni ta cham nge bugel riy! Ra par ni dabki t’uf e polis, nge kalbus, ara pi court ni yima pufthinnag e tin kireb riy nib tolang puluwon ma ba mo’maw’. Ba fayleng ni ra par ni ra be’ ma be ta’ fan e yafas nge tirok boch e girdi’ ban’en. Gur re nem kaygi pag feni fel’ ni nge riyul’? Rayog ni ngam lemnag ni aram rogon, machene re n’ey ni nge thil ni nge fel’ ni yira ngat ngay e ri ir e n’en ni be micheg e Bible. Mang fan ni dab mu lemnag e n’en ke yog e Bible u murung’agen e cham nge bugel nge ku boch e kireb u daken e re fayleng ney?

U lan fare ke babyor ni Psalms, e gad ra bieg riy ni gaar: “Dab mu dag ni kam damumuw ni bochan e piin ni yad ma rin e kireb. Dabi awan’um ngak e piin ni be rin’ e tin nde mat’aw. Ya bod e pan yad ra mororoy nib pay, maku bod e pan nib galunglung ni kab biech ni ra m’ay raen nga bang. Machane piin nib sumunguy e yad ra tafanay e fayleng, ma yad ra pirieg e falfalan’ gel u fithik’ e gapas.” (Psalm 37:1, 2, 11, NW) Riyul’, dariy be’ ni rayog ni nge taleg Got ko biney ni ke micheg nge urngin e tin ni ke micheg.

Kanawoen ni ngebnag Got e pi taw’ath ney e Am rok. U lan fare meybil rok Somol, e i fil Jesus Kristus ngak pi gachalpen ni ngar yibilayed ere am ney ni nge yib nge ngan rin’ e tin nib m’agan’ Got ngay “ni bod u tharmiy maku arrogon u fayleng.” (Matthew 6:9, 10) Dabki n’uw nap’an, ma u tan e re Am nem, e dakuriy be’ u fayleng ni yira k’aringan’ ni nge cham ara bugel ni bochan e gafgow, fa mochuch, fa siin. Ya n’en ni ra yib nga lon, e Thin rok Got ni gaar: “Me par e nam nib sug ko grain; me sug daken yungi ted ko woldug.” (Psalm 72:16) Riyul’, ni Jehovah Got e yug bay i pi’ ngak urngin e girdi’ nu fayleng ni dabi mus e tin nib fil ban’en. Ma n’en kab ga’ fan, e rogon e par ko girdi’ e bayi par u fithik’ e t’ufeg ngak Got nge piin buguli yoror, ma ri dakuriy biyay ni bayki magawonnag e cham nge bugel e fayleng.