Fan Ni Yad Be Yan Nga Galesiya

“FARE Republic nu Korea e chiney e ke chugur i aningeg yay ni ke yoor e piin ni yad e Presbyterian ngak yu Meriken.” Re thin nem ni ba’ ko Newsweek magazine e sana boor e girdi’ ni ma bieg ni ke gin ngay, ni bochan ni yooren e girdi’ e ma lemnag yu Korea ni yad ba nam ni teliw ni Confucian nge Buddhist e ba yoor riy. Chiney, e ra yan be’ e ngaram ma ra pirieg ni boor e galesiya ko “Kristiano” u rom, ni baga ni ma gagiyelnag ba kuruth ni bay bogi tama riy ni be mat nib rorow. Ra madenom, ma baga’ ni yima guy e girdi’ ni l’al’agruw nge dadalip ni bay e Bible u pa’rad, ni yad be yan nga galesiya. U rogon reb e survey ntay ko duw ni 1998, e ba chugur i 30 pasent ko girdi’ nu Korea e ma yan ko galesiya ko Katolik fa Protestant, boor ko tin baaram ni yad be yog ni yad e Buddhist.

Biney e rran nge yangar, e gathi ri kiy ma guy e girdi’ ni aram oren u bayang ni be yan nga galesiya u gubin ngiyal’. Machane, ku be buch ni gathi yi goo yu Korea ya ku arrogon u boch e nam u Asia, maku e ri tay yu Africa nge Latin America. Mang fan ni ri ka boor e girdi’ ni be yog nib mich u wan’rad Got ko ya girdi’ ni dariy fan e teliw u wan’rad e gowa kari garer u fayleng? Mang fan ni yad be yan nga galesiya?

Reb e survey nta’ ngak ba ulung e girdi’, e m’ug riy ni boor ko baley ko girdi’ nu Korea ni ma yan nga galesiya e yad be gay e gin nge gapas lanin’rad riy; ma gonapan taab guruy u dalip guruy e yad be athapeg e yafas ni manemus u tomuren ni kar m’ad; ma taa be’ u ragag e girdi’ e be athapeg e fel’ fithik’dow, me yoor ban’en rok, nge fel’ rogon ko urngin.

Boor e girdi’ nu China e yad ma yan nga galesiya rorad ni yu ulung ya yad be athapeg ni ngar pirieged e tin ra gamaneg e tirok Got ni dariy rorad ni buch ko ngiyal’ ni lem rorad ni nge fel’ ni bochan e siobay e buchuw ma buchuw ma ke yan nga lon e lem ni Communist. Gubin e duw, ma bokum million ken e Bible ni kan fal’eg ngan wereg u China, ma girdi’ e ba dake yad be bieg ni bod feni elmerin ni yad ma bieg fare babyor rok Mao Tse-tung nib achichig mab rorow.

Urngin e pi n’ey e be dag ni yugu aram rogon ni boor e girdi’ e kab mich Got u wan’rad, ma boor iyad e kab ga’fan u wan’ e n’en ni nge yog ngorad e chiney ko n’en ni bay finib maku aram rogon nga murung’agen Got.