Rayog Ni Nge Gol Be’ Nib M’ar Ni Bochan E Michan’ Rok, Fa?
NAP’AN nra yib e m’ar ngodad e gad ra guy rogon ni ngada golgad ko m’ar rodad. Sana ga manang ko tin ni kam bieg u Bible ni boor yay ni ke golnag Jesus Kristus boor miti liliy me baud boor e piin ni kar gafgowgad. Ke diin me gol e pi girdi’ nem? Be yog e Bible ni kar golgad ni bochan “gelngin Got.” (Luke 9:42, 43; Acts 19:11, 12) Ere ke gol e pi girdi’ nem ni bochan e kan ni thothup ma gathi ke mus ni bochan e bay e michan’ rorad. (Acts 28:7-9) Aram fan ni de tay Jesus ni thingari yog e girdi’ nib m’ar ni ke mich u wan’rad mfin ra golgad ko liliy rorad.
Sana kam lemnag u wan’um: “Ke m’ay e pi maang’ang’ nem ni ke fl’eg Jesus fa ku ra buch biyay? Bay ban’en nrayog ni nge athapeg e piin ni yad ba gafgow ko liliy, fa?”
Be weliy e Bible ni bayi taw ko fare m’ag rok Got nib biech mab mat’aw ma ku ra maruwel gelngin Got biyay ma nge gol e liliy biyay ni bod rogon fapi maang’ang’ ni fl’eg Jesus u nap’an ni immoy u fayleng. Ra falfalan’ e Pi Mich Rok Jehovah ni ngar weliyed rogon nge ngiyal’ nra chuweg Got urngin e liliy ma ra chuweg e yam’−ni ban’en ni dabiyog ni nge rin’ e girdi’. Arrogon, “ra chuweg Got e yam’ ni manemus.”—Isaiah 25:8.