Thingarda Meybilgad ko Pi Engel ni Ngad Ninged e Ayuw Fa?

BA puluw ni ngan meybil ngak e pi engel u nap’an ni kan mochuch? Boor e girdi’ ni ma lemnag ni aram rogon. Riyul’, ya fare New Catholic Encyclopedia e be gaar: “Be’ e ra meybil ko . . . pi engel . . . machane kemus ni bod ni ngar wenignaged gadad u p’eochen Got.” Thingarda meybilgad ko pi engel ni ngar weniggad u paadad fa?

Thin rok Got e ke mus ni ri l’agruw e engel rok Got ni yow ba yul’yul’ e pi’ fithingrow ni, Michael nge Gabriel. (Daniel 8:16; 12:1; Luke 1:26; Jude 9) Bochan ni gal ngachal ney e nog u lan e Bible, ma kad nanged ni ra reb e kan ma ba’ fithingan, gathi yugu ban’en ni gelngin be’. Machane, yugu boch e engel e kar siyeged ni nga rogned fithingrad. Bod rogon, fa ngiyal’ ni fith Jakob fithingan ba engel nib ngak, me siyeg ni nge rin’. (Genesis 32:29; Judges 13:17, 18) Dariy babyoren fithingan e pi engel ni kan pi’ u lan e Bible, bochan ni nge taleg e girdi’ ni nge dabi mang yad e un lemnagrad nib gel.

U fithik’ e maruwel ko pi engel e ba’ fare n’en ni yad ma thapeg e thin rok Got ngak e girdi’. Riyul’, ya bin ni ri thin ni Hebrew nge Greek nni piliyeg ni “engel” e ri fan e “tamol’og.” Machane, pi engel e da ra ma pigpiggad ni nga u ranod u thiliy ngaur feked e meybil ko girdi’ i yan nga tagil’ e an Th’abi Tolang. Ke mudugil u wan’ Got ni pi meybil e ngaun pi ngak u daken fithingan Fak, ni Jesus Kristus, ni gaar: “Demtrug e n’en ni gimed ra ning ngak e eni Chitamangiy u daken fithingag ma ra yog ni pi’ ngomed.”​—John 15:16; 1 Timothy 2:5.

Jehovah Got e de yoor pa’ u puluwon ni nge dabi motoyil ngodad ni faan gad ra yan ngak nrogon ni ngan rin’. Fare Bible e micheg e re n’ey ni gaar: “Jehovah e ba chugur ngak urngin e piin ni yad be pining, ni piin ni rriyul’ ni yad be pining.”​—Psalm 145:18, NW.